Paytaxtın abad məhəllələrində mini futbol yarışları başa çatıb - FOTO

Bakı Şəhər İcra Hakimiyyəti, Regional İnkişaf İctimai Birliyi və Bakı Şəhər Gənclər və İdman İdarəsinin birgə təşkilatçılığı ilə keçirilən böyük bir turnir başa çatdı. Bu minifutbol yarışı Vətən müharibəsində qazanılmış Şanlı Qələbənin 5-ci ildönümünə həsr olunmuşdu və “Zəfərindən Güc Al” devizi ilə keçirilirdi. Turnir 2013-2014-cü il təvəllüdlü yeniyetmələri əhatə edirdi. Yarışmanın əsas məqsədi gənclərdə vətənpərvərlik ruhunu gücləndirmək, sağlam həyat tərzini təşviq etmək və onları idmanla məşğul olmağa cəlb etmək idi. Bu genişmiqyaslı idman tədbiri Bakı şəhərinin bütün rayonlarını əhatə etdi.

Yarışlar iki mərhələdə keçirildi: əvvəlcə rayon, daha sonra isə şəhər mərhələləri. Ümumilikdə 123 komanda bu mübarizəyə qatıldı və 1266 yeniyetmə idmançı meydanlarda yarışdı. Turnir olimpiya sistemi üzrə təşkil olunmuşdu. Oyunlar Leyla Əliyevanın təşəbbüsü ilə həyata keçirilən "Bizim həyət" layihəsi çərçivəsində salınan mini-futbol stadionlarında, yəni abad məhəllələrdə keçirildi. Turnirin birinci turu oktyabrın 24-də yekunlaşdıqdan sonra rayon turlarının qalibləri Abad məhəllələrarası mini futbol çempionatının Bakı şəhər mərhələsində mübarizəyə başladı.

Respublika səviyyəli hakimlərin nəzarət etdiyi turnirə oktyabrın 31-də final oyunları ilə yekun vuruldu. Final qarşılaşmasından əvvəl məşhur müğənnilər - Çinarə Məlikzadə və İlhamə Qasımova tədbir iştirakçıları qarşısında çıxış etdilər. Rəsmi açılışdan sonra final oyunu başladı. Həlledici qarşılaşmada Yasamal rayonunun komandası Sabunçu rayonunun komandası ilə mübarizə apardı. 7:5 hesabı ilə qalib gələn Yasamal rayonunun komandası turnirin çempionu oldu. Qalib komanda Fəxri Fərmanlar və qiymətli hədiyyələrlə mükafatlandırıldı. Tədbir böyük atəşfəşanlıqla başa çatdı, sonda xatirə şəkilləri çəkildi.