Pentaqon Avropaya B-52H strateji bombardmançı təyyarələri göndərib

ABŞ Hərbi Hava Qüvvələrinin Avropadakı Komandanlığı xəbər verib ki, "B-52H Stratotanker" strateji bombardmançı təyyarəsi qrupu çoxtərəfli təlimlərə qatılmaq üçün İspaniyaya gəlib. Bu təyyarələr İspaniyadakı Moron hava bazasına yerləşdirilib. Təlimlər Finlandiya, Litva, İsveç kimi müttəfiq və tərəfdaş ölkələrlə birlikdə keçiriləcək. Amerikanın üç B-52H bombardmançı təyyarəsi Luiziana ştatının Barksdeyl Hava Qüvvələri bazasından bir gün əvvəl havaya qalxmışdı.

Hərbçilər bu yerləşdirmənin səbəbini izah etdilər. Bu cür çoxtərəfli təlimlər çərçivəsində qüvvələrin və vasitələrin yerləşdirilməsi ABŞ Hərbi Hava Qüvvələrinin bombardmançı ekipajlarına geniş imkanlar verir. Onlar yaranan təhdidlərə sürətli cavab vermək üçün taktikalarını inkişaf etdirməyə çalışırlar. Təlimlərdə iştirak edən ekipajlar əməliyyatlar meydanında yüksək təhdidlərin olduğu mürəkkəb hava məkanında hərəkətləri təqlid edən bir sıra uçuşlar həyata keçirəcəklər. Bu, ekipajların döyüş hazırlığını artırmağa hesablanıb.

Bu addım, həmçinin, ABŞ-a NATO-nun şərq cinahında və uzaq şimal bölgələrində etibarlı maneə yaratmağa kömək edir. Qüvvələrin bu bölgələrdə olması təhlükəsizlik və dayanıqlıq baxımından vacibdir. ABŞ bombardmançı təyyarələri ilə keçirilən bu təlimlər müttəfiqlərarası əməkdaşlığı gücləndirir və kollektiv müdafiə qabiliyyətini yaxşılaşdırır.