Prezidentin xüsusi tapşırıqlar üzrə nümayəndəsi Elçin Əmirbəyov Efiopiyada işgüzar səfərdə olub (FOTO)

Azərbaycan Respublikası Prezidentinin xüsusi tapşırıqlar üzrə nümayəndəsi Elçin Əmirbəyov Efiopiya Federativ Demokratik Respublikasına işgüzar səfər edib. Səfər zamanı o, Efiopiyanın Baş naziri Abiy Ahmed Ali, Prezident Taye Atske Selassi, Parlamentin sədri Tagesse Çafo və xarici işlər naziri Gedion Timotheos ilə görüşlər keçirib.

Aparılan danışıqlarda iki ölkə arasındakı münasibətlərin indiki durumu və onların inkişaf etdirilməsi imkanları ətraflı müzakirə olunub. Əmirbəyov, ölkəmizin Afrika qitəsi ilə əlaqələrin genişləndirilməsinə xüsusi dəyər verdiyini vurğulayıb. O, Efiopiya Federativ Demokratik Respublikası ilə son zamanlar ikitərəfli və çoxtərəfli müstəvidə müxtəlif sahələrdə dinamik inkişaf edən əməkdaşlıqdan məmnunluq ifadə edib. Nümayəndə münasibətləri yaxşılaşdırmaq üçün mühüm potensialın mövcud olduğunu qarşı tərəfin diqqətinə çatdırıb.

Prezidentin nümayəndəsi ötən ilin noyabr ayında COP29 çərçivəsində hər iki ölkə Prezidenti arasında Bakıda baş tutan görüşün xüsusi önəmini qeyd edib. O, həmin görüşün ikitərəfli əməkdaşlığın konkret sahələrini müəyyən etdiyini xatırladıb. Əmirbəyov ondan sonra baş tutan yüksək səviyyəli nümayəndə heyətlərinin qarşılıqlı səfərlərinin təşkil olunmasında Azərbaycan tərəfinin Efiopiya ilə əməkdaşlığı davam etdirməyə hazır olduğunu bildirib. Bu xüsusda, Efiopiyanın Baş nazirinə Prezident İlham Əliyevin ölkəmizə səfərə dair dəvəti çatdırılıb.

Baş nazir Abiy Ahmed Ali dəvətə görə Prezident İlham Əliyevə təşəkkürünü bildirib və Azərbaycana səfər edəcəyini deyib. Baş nazir Azərbaycanın Efiopiyada fərqli istiqamətlərdə apardığı fəaliyyəti yüksək qiymətləndirib. O, ölkəmizi etibarlı və səmimi dost hesab etdiyini vurğulayıb. Baş nazir xüsusilə ASAN Xidmət modelinin tətbiqi vasitəsilə ölkəsində ictimai və dövlət xidmətlərinin keyfiyyətinin artırılmasına verdiyi töhfəyə görə rəsmi Bakıya minnətdarlığını ifadə edib. Ali, ölkələrimiz arasında kənd təsərrüfatı, mədən sənayesi, təhsil, müdafiə, bərpa olunan enerji, ticarət və sərmayələr sahələrində əməkdaşlığın dərinləşdirilməsi üçün geniş imkanlar olduğunu qeyd edib. O, bütün bu istiqamətlərdə Azərbaycanla sıx işləməyə hazır olduğunu bildirib.

Baş nazir həmçinin Azərbaycanın COP29-da qazandığı uğurlu təcrübəyə istinad edərək, COP32-nin təşkilində Efiopiyaya dəyərli dəstək göstərilməsini xahiş edib. Elçin Əmirbəyov, öz növbəsində, COP32-yə sədrlik etməsinə dair qəbul edilmiş qərar münasibətilə qarşı tərəfi təbrik edib. O, Azərbaycanın müvafiq tədbirin təşkili ilə bağlı Efiopiya ilə təcrübə və məlumat mübadiləsi aparmağa hazır olduğunu vurğulayıb. Görüş zamanı Efiopiya rəsmiləri Ermənistanla münasibətlərin normallaşma prosesi üzrə əldə olunan irəliləyişlər münasibətilə Azərbaycan tərəfinə səmimi təbriklərini çatdırıblar.

Danışıqlar zamanı Əmirbəyov Efiopiya tərəfini Azərbaycan və Ermənistan arasında münasibətlərin normallaşdırılması istiqamətində görülən işlər barədə ətraflı məlumatlandırıb. O, regionda dayanıqlı sülhün təmin edilməsi üçün atılan addımları açıqlayıb. Bu kontekstdə, Zəngəzur dəhlizinin, o cümlədən Beynəlxalq Sülh və Rifah üçün Tramp Marşrutunun Cənubi Qafqazın tranzit potensialının gücləndirilməsinə, habelə regionda sülh və təhlükəsizliyin təmin olunmasına töhfəsi baxımından strateji əhəmiyyəti izah edilib.

Prezident Taye Atske Selassi ötən il Bakıda Azərbaycan Prezidenti ilə keçirdiyi səmimi və səmərəli görüşü xatırladıb. O bildirib ki, həmin fikir mübadiləsi iki ölkə arasında münasibətlərin yeni mərhələyə yüksəlməsinə vacib təkan verib. Prezident, dost saydığı Azərbaycanla ikitərəfli əlaqələrin inkişafına öz tərəfindən hər cür dəstək verməyə hazır olduğunu dilə gətirib. Xarici işlər naziri Gedion Timotheos sadiq tərəfdaş kimi Azərbaycanla əməkdaşlığın hüquqi bazasını zənginləşdirməyə və həmin əməkdaşlığı yeni, praktiki sahələrlə təkmilləşdirməyə marağını ifadə edib.

Səfər çərçivəsində Afrika İttifaqı Komissiyasının sədri Mahmud Ali Yusuf ilə də görüş keçirilib. Görüşdə Əmirbəyov Azərbaycan Prezidenti İlham Əliyevin Ümumdünya Şəhərsalma Forumunun On Üçüncü Sessiyasında iştirak məqsədilə sədrə ünvanladığı dəvətnaməni diqqətə çatdırıb. Qeyd olunub ki, Azərbaycan tərəfinin Qoşulmama Hərəkatına sədrliyi ərzində Afrika İttifaqına üzv ölkələrlə əlaqələrin inkişaf etdirilməsi prioritet sahələrdən biri olub. Afrika İttifaqı Komissiyasının sədri Azərbaycanın humanitar yardım, rəqəmsal transformasiya, səhiyyə və təhsil sahələrində göstərdiyi səmimi və dəyərli dəstəyə görə minnətdarlığını bildirib. O, ölkəmizlə münasibətlərin institutsionallaşdırılması üzrə fəaliyyət göstərməyə hazır olduğunu qeyd edib. Danışıqlar zamanı Afrika İttifaqı ilə Azərbaycan arasında strateji əlaqələrin genişləndirilməsinə yönəlik perspektivli çərçivə sazişinin hazırlanmasına niyyət ifadə olunub.

Görüşlərdə Elçin Əmirbəyov Ermənistanın təxminən 30 il davam edən işğal siyasətinin nəticəsi kimi Azərbaycanın mədəni irs abidələrinin dağıdılması və ölkəmizin geniş miqyaslı mina problemi barədə qarşı tərəfi ətraflı məlumatlandırıb. O, bu mövzulara dair nəşrləri onlara təqdim edib. Əmirbəyov səfər çərçivəsində həmçinin Efiopiyanın nüfuzlu media qurumu olan "FANA TV"yə müsahibə verib.