"Qarabağ"ın U-12 komandası Qazaxıstandakı beynəlxalq turnirə qələbə ilə başlayıb

“Qarabağ” klubunun U-12 komandası Qazaxıstanın paytaxtı Astanada keçirilən beynəlxalq turnirə qələbə ilə start verib. Ağdam təmsilçisi ilk görüşdə “Kızıljar” (Qazaxıstan) komandası üzərində 2:0 hesabı ilə inamlı qələbə qazandı. Bu, Azərbaycan təmsilçisinin turnirdəki ilk oyunu idi.

Komandanın baş məşqçisi Şöhrət Yusifov bu cür yarışların gənc futbolçuların beynəlxalq təcrübəsini artırmaq baxımından çox əhəmiyyətli olduğunu bildirib. Məşqçi oyunun yekun nəticəsinin o qədər də vacib olmadığını vurğulayıb. O, bu yaşda uşaqların texniki-taktiki inkişafının daha önəmli olduğunu qeyd etdi. Onun turnirdən gözləntiləri birbaşa uşaqların inkişafı ilə bağlıdır. Şöhrət Yusifov qeyd etdi ki, hər matç gənc oyunçular üçün dəyərli bir təcrübədir. Əgər uşaqlar turnirdə yaxşı oyun nümayiş etdirə bilsələr, ən azı mükafatçılar sırasında olacaqlarına inanır.

Azərbaycan komandası beynəlxalq yarışda ümumilikdə 6 görüş keçirməyi planlaşdırır. Bu beynəlxalq turnirdə Qazaxıstan, Azərbaycan, Rusiya, Gürcüstan, Özbəkistan, Qırğızıstan və Tacikistanın təmsilçiləri iştirak edir. Turnir dekabrın 8-də yekunlaşacaq.