Qazaxıstan 2030-cü ilə qədər qaz hasilatı ilə bağlı planlarını açıqlayıb

Qazaxıstan 2030-cu ilə qədər təbii qaz hasilatı həcmini əhəmiyyətli dərəcədə yüksəltməyi planlaşdırır. Ölkə 2024-cü ildə təxminən 59 milyard kubmetr qaz hasil edib. Lakin qarşıdakı altı il ərzində bu rəqəmin təxminən 74 milyard kubmetrə çatdırılması hədəflənir.

Bu böyük plan Bakıda keçirilən SPE 2025 Xəzər Texniki Konfransında açıqlandı. Hədəfləri "KMG-Karaçaqanak"ın baş direktorunun istehsalat üzrə müavini Andrey Kan bəyan etdi. O, ölkənin enerji strategiyasında qaz hasilatının artırılmasının mərkəzi yer tutduğunu vurğulayıb. Qazaxıstan təxminən 3,8 trilyon kubmetr həcmində böyük təbii qaz ehtiyatlarına malikdir. Bu böyük ehtiyatın 19 faizi əsas yataqlarda cəmləşib.

Ölkənin resurs bazasının əsasını nəhəng neft və qaz-kondensat yataqları təşkil edir. Ən iri yataqlar Qazaxıstanın qərbində, xüsusən də Tengiz, Kaşaqan və Karaçaqanak bölgələrində yerləşir. A. Kan qeyd edib ki, 2030-cu ilə qədər hədəflənən 74 milyard kubmetrlik hasilat böyük göstəricidir, amma texniki məsələləri nəzərə almaq lazımdır. Məsələ burasındadır ki, hasil olunan qazın demək olar ki, 50 faizi lay təzyiqini saxlamaq və neftverməni artırmaq məqsədilə geri təbəqəyə vurulur.

74 milyard kubmetrlik hədəfə çatmaq üçün xüsusi strategiyalar müəyyənləşdirilib. Bu plan yataqların işlənməsi, emal güclərinin genişləndirilməsi və qazın çıxarılma əmsalının artırılması hesabına həyata keçiriləcək. Bu tədbirlər Qazaxıstanın qaz sənayesinin dayanıqlı inkişafını təmin edəcək və ölkənin enerji sektorundakı mövqeyini möhkəmləndirəcək.