Quş qripi xəstəliyinə qarşı epizootoloji monitorinq keçiriləcək

Qida Təhlükəsizliyi Agentliyi (AQTA) quş qripi xəstəliyinə qarşı növbəti epizootoloji monitorinq təşkil edir. Bu yoxlamalar cari ilin 8-12 dekabr tarixlərində həyata keçiriləcək. Monitorinqin əsas məqsədi ölkə ərazisində xəstəliyin törədicisini aşkar etmək, həmçinin onun yayılma riskini qiymətləndirməkdir. Yoxlamalar risk əsasında müəyyən edilmiş geniş əraziləri əhatə edəcək. Buraya ovçuluq təsərrüfatları, milli parkların su-bataqlıq zonaları və dənizsahili ərazilər daxildir. Quş qripi xəstəliyinə qarşı həyata keçirilən monitorinq vəhşi və ev quşlarının sağlamlığının yoxlanılması üçün önəmli bir tədbirdir.

Monitorinq çərçivəsində əraziyə ümumi baxış keçiriləcək, eyni zamanda vəhşi quşlar da nəzarətə cəlb ediləcək. Xəstəliyin törədicisinin aşkar edilməsi üçün vəhşi quşlar ovlanacaq və onlardan nümunələr götürüləcək. Diaqnostik nümunələr fərqli həcmli sənaye quşçuluq müəssisələrində saxlanılan ev quşlarından, eləcə də rayonlardakı və şəhərlərdəki ailə təsərrüfatlarından da toplanacaq. Əlavə olaraq, ölkə üzrə müəssisələrə, təsərrüfatlara, su hövzələrinə və parklara baxış keçiriləcək. Məqsədyönlü maarifləndirmə-təbliğat tədbirləri görüləcək, toplanan epizootoloji məlumatlar analiz ediləcək. Bütün epizootoloji vəziyyət və götürülmüş nümunələr haqqında məlumatlar “Epicollect 5” proqramına daxil ediləcək.

Bu böyükmiqyaslı yoxlama tədbirində bir sıra dövlət qurumlarının əməkdaşları iştirak edir. Qida Təhlükəsizliyi Agentliyinin və Qida Təhlükəsizliyi İnstitutunun işçiləri monitorinq qrupundadır. Kənd Təsərrüfatı Nazirliyi yanında Aqrar Xidmətlər Agentliyinin Heyvan Sağlamlığı və Baytarlıq Xidmətləri Mərkəzi, yerli Heyvan Sağlamlığı və Baytarlıq Xidmətləri İdarələri də prosesdə iştirak edir. Ekologiya və Təbii Sərvətlər Nazirliyi yanında Bioloji Müxtəlifliyin Qorunması Xidməti və Səhiyyə Nazirliyinin Xüsusi Təhlükəli İnfeksiyalara Nəzarət Mərkəzi də heyətdə təmsil olunur. Tədbirlər müddətində götürülən bütün nümunələr İnstitutun Mərkəzi Baytarlıq Laboratoriyasında müayinələrə cəlb olunacaq. Bu, xəstəliklərin nəzarətdə saxlanılması üçün aparılan vacib işlərdən biridir.