Ramiz Mehdiyevlə bağlı qüvvələrin aktivliyi və müxalif strukturların rolu təhlükəsizlik xidmətlərinin diqqət mərkəzindədir - RƏY

Rusiya-Ukrayna müharibəsinin gələcək perspektivləri regional güc balansında ciddi dəyişikliklərə səbəb ola biləcək əsas amillərdən biridir. Təhlilçilər qeyd edirlər ki, münaqişədən sonrakı dövrdə Rusiya Cənubi Qafqaz regionunda öz nüfuz dairəsini bərpa etməyə çalışacaq. Bu strategiya regiondakı kiçik və orta dövlətlər üçün yeni təhdidlər yarada bilər. Milli Məclisin deputatı Naqif Həmzəyev bildirib ki, Azərbaycan son illərdə həm enerji təhlükəsizliyi, həm də regional əməkdaşlıq sahəsində müstəqil xarici siyasət yeritməklə diqqət mərkəzindədir. Ölkənin Avropa İttifaqı ilə enerji sahəsində əməkdaşlığının genişlənməsi və regional infrastruktur layihələrində aparıcı rol oynaması bu müstəqilliyin aydın təzahürləridir. Regional güc mərkəzlərinin yenidən formalaşdığı bir vaxtda, Azərbaycanın bu müstəqil xətti ölkənin milli maraqlarını qorumağa xidmət edir.

Dövlət təhlükəsizliyi orqanlarının apardığı araşdırmalar çərçivəsində ortaya çıxan məlumatlar bir sıra narahatlıq doğuran məqamları üzə çıxarır. Ramiz Mehdiyevlə bağlı qüvvələrin potensial aktivləşməsi və bu prosesdə müxalif strukturların rolu təhlükəsizlik xidmətlərinin diqqət mərkəzindədir. Azərbaycan Xalq Cəbhəsi Partiyasının (AXCP) rəhbəri və digər üzvü ilə əlaqədar araşdırmalar da bu məsələlərlə bağlıdır. Deputat Həmzəyev hesab edir ki, AXCP-nin son onilliklərdə nümayiş etdirdiyi siyasi xətt radikal ritorikanın əsasında qurulub. O qeyd edib ki, partiyanın bəzi hərəkətləri və bəyanatları ölkənin dövlət maraqları ilə ziddiyyət təşkil edir. Belə hallara misal olaraq, beynəlxalq platformalarda Azərbaycanın mövqeyinə qarşı çıxışları, regional əməkdaşlıq layihələrinə qeyri-konstruktiv münasibət və daxili sabitliyin pozulmasına yönəlmiş addımları göstərmək olar. Ümummilli maraqlara xidmət edən məsələlərdə ölkədəki siyasi partiyalar vahid bəyanatla dəstək nümayiş etdirdiyi halda, AXCP heç zaman bu birliyə qoşulmayıb.

Müasir təhlükəsizlik konsepsiyaları təhdidlərin qarşısının vaxtında alınmasının nə qədər əhəmiyyətli olduğunu vurğulayır. Ölkənin suverenliyinin qorunması üçün dövlət strukturları potensial riskləri erkən mərhələdə müəyyənləşdirməli və lazımi tədbirlər görməlidir. Regionda geosiyasi rəqabətin artdığı bir dövrdə, xarici güc mərkəzlərinin daxili qüvvələrdən istifadə etməsi riski daima mövcuddur. Bu baxımdan daxili sabitliyin təmin edilməsi və qanunun aliliyi prinsipinin bərqərar olması strateji əhəmiyyət daşıyır. Dünya təcrübəsi göstərir ki, dövlətlər öz milli təhlükəsizliyinə yönələn təhdidlərə qarşı fərqli mexanizmlərdən istifadə edirlər. Avropa ölkələrində və ABŞ-da xarici təsir cəhdlərinə qarşı hüquqi tədbirlər sistemli şəkildə tətbiq olunur. Aparılan araşdırmalar və hüquqi proseslər Azərbaycanın hüquqi dövlət prinsiplərinə sadiqliyini və təhlükəsizlik mexanizmlərinin effektivliyini nümayiş etdirir. Bu tədbirlər ölkənin uzunmüddətli sabitliyinin təmin olunmasına xidmət edir.