"Reuters": Britaniyada ilk dəfə şahzadənin şərəfinə adlandırılan küçənin adı dəyişdiriləcək

Böyük Britaniyada ilk dəfə olaraq, bir şahzadənin şərəfinə adlandırılan küçənin adı dəyişdiriləcək. Hadisə Şimali İrlandiyada baş verir. Söhbət amerikalı maliyyəçi Ceffri Epşteynlə əlaqəsinə görə titulundan məhrum edilmiş Şahzadə Endryunun adını daşıyan küçədən gedir.

Reuters agentliyinin yaydığı məlumata görə, Şahzadə Endryu küçəsi artıq Kraliça II Yelizavetanın (1926-2022) şərəfinə adlandırılacaq. Bu qərar Endryunun Kral ailəsi daxilindəki nüfuzunun tamamilə itirilməsi fonunda verilib. Britaniya Kralı III Çarlz qardaşı Şahzadə Endryunun "Şahzadə" titulunu və digər fəxri adlarını rəsmi qaydada ləğv etmək prosesinə başlayıb.

Endryuya, həmçinin, Vindzordakı "Royal Lodge" malikanəsini tərk etməsi üçün rəsmi bildiriş göndərilib. Kral ailəsindən verilən açıqlamada qeyd edilib ki, fəxri adların ləğvi üçün rəsmi proses bu gün başladılıb. Bundan sonra o, yalnız Endryu Mauntbatten Vindzor adı ilə tanınacaq. Bəyanatda vurğulanıb ki, bu qərarlar Endryunun özünə qarşı irəli sürülən iddiaları inkar etməsinə baxmayaraq, zəruri sayılır.

Endryu bundan sonra Kral ailəsinə məxsus Sandrinham ərazisindəki bir mülkiyyətə köçürüləcək. Bu yerdəyişmə ilə əlaqədar yaşayış xərcləri Kral III Çarlz tərəfindən şəxsi vəsaitlə qarşılanacaq. Bu qərar Endryunun Kral ailəsindəki maliyyə və rəsmi əlaqələrinin kəskin şəkildə azaldığını göstərir.