Rubio Ukrayna danışıqlarında mübahisə doğuran əsas müddəanı açıqlayıb

Rusiya-Ukrayna müharibəsinə son qoymaq üçün aparılan danışıqlarda əsas fikir ayrılığı yaradan məsələ, Ukraynanın Donetsk vilayətinin hələ də Kiyevin nəzarəti altında qalan 20% ərazisidir. ABŞ dövlət katibi Marko Rubio "Fox News" telekanalına verdiyi müsahibədə məhz bu müddəanın mübahisə doğurduğunu bildirib.

Rubio qeyd edib ki, hazırda tərəflərin sözün əsl mənasında mübahisə etdiyi sahə təxminən 30-50 kilometrlik bir zolaq və Donetsk vilayətinin həmin 20%-lik hissəsidir. O əlavə edib ki, danışıqlarda ukraynalıların hansı şərtlərlə yaşaya biləcəyini və onların gələcək təhlükəsizliyinə zəmanət verəcək məqamları anlamağa çalışdılar. Rubio bu sahədə müəyyən irəliləyiş əldə edildiyini düşünür.

Bu açıqlamalar, Rusiyada keçirilən yüksək səviyyəli görüşlərdən sonra səslənib. Dekabrın 2-də Rusiya Prezidenti Vladimir Putinin Moskvada ABŞ Prezidentinin xüsusi nümayəndəsi Stiv Uitkoff və Donald Trampın kürəkəni Cared Kuşnerlə görüşü oldu. Bu görüş 5 saatdan çox davam etdi. Görüşün əsas mövzusu Ukraynada nizamlanma məsələsi idi. Rusiya prezidentinin köməkçisi Yuri Uşakovun dediyinə görə, amerikalıların hazırladığı sülh planının dörd sənədindəki təkliflərin mahiyyəti bu görüşdə müzakirə edilib.