Rumıniya və Azərbaycan arasında media sahəsində əməkdaşlıq müzakirə olunub (FOTO)

Rumıniyada səfərdə olan Azərbaycan nümayəndə heyəti bu ölkənin Parlament binasında senator Kristian-Avqustin Nikulesku-Tağârlaşın rəhbərlik etdiyi senator qrupu ilə görüşüb. Görüşdə Medianın İnkişafı Agentliyinin (MEDİA) İcraçı direktoru Əhməd İsmayılov, Audiovizual Şuranın sədri İsmət Səttarov, AZƏRTAC-ın İdarə Heyətinin sədri Vüqar Əliyev və Azərbaycanın Rumıniyadakı səfiri Qüdsi Osmanov da daxil olmaqla, nümayəndə heyətinin üzvləri iştirak ediblər. Əsas müzakirə mövzuları iki ölkə arasında institusional dialoqun güclənməsi, media sferasının hüquqi tənzimlənməsi sahəsində təcrübə mübadiləsi oldu. İnformasiya təhlükəsizliyi və dezinformasiyaya qarşı mübarizə də danışıqların gündəmində mühüm yer tutdu.

MEDİA Agentliyinin İcraçı direktoru Əhməd İsmayılov çıxışında Azərbaycanda media sahəsində həyata keçirilən islahatları açıqladı. O, bu təşəbbüslərin hüquqi əsasları, beynəlxalq təcrübənin öyrənilməsi və tətbiqi barədə geniş məlumat verdi. İsmayılov media resurslarının rəqəmsal informasiya mühitinə daxil edilməsi, həmçinin süni intellektin istifadəsi zamanı hüquqi və etik çərçivələrin qurulması istiqamətində görülən işlərdən bəhs etdi. O, bu sahələrdə ikitərəfli əməkdaşlığın vacibliyini xüsusi qeyd etdi. Audiovizual Şuranın sədri İsmət Səttarov da Azərbaycanın audiovizual siyasəti, media tənzimləmə təcrübəsi və son illərdə aparılan islahatlar haqqında danışdı. Səttarov bildirdi ki, media mühitinin şəffaflığını artırmaq, rəqəmsal yayımı inkişaf etdirmək və ictimai yayımın müstəqilliyini gücləndirmək üçün ciddi addımlar atılıb.

Görüş zamanı Rumıniya tərəfi də öz ölkəsinin media və hüquq sahəsindəki qanunvericilik təcrübəsini təqdim etdi. Onlar qeyd etdilər ki, Rumıniya audiovizual tənzimləmə, mətbuat azadlığı, dezinformasiyanın qarşısının alınması və rəqəmsal məkanın idarə edilməsi sahələrində Avropa İttifaqının tələblərinə uyğun qanunvericilik çərçivəsini təkmilləşdirib. AZƏRTAC-ın rəhbəri Vüqar Əliyev Azərbaycan mediasının beynəlxalq əməkdaşlıq fəaliyyətindən bəhs etdi. O, Rumıniya ilə qarşılıqlı əlaqələrin regional sabitliyə və etimada mühüm töhfə verəcəyini vurğuladı. Səfir Qüdsi Osmanov isə iki ölkə arasında strateji tərəfdaşlığın yalnız enerji və nəqliyyatda deyil, informasiya və kommunikasiya müstəvisində də dərinləşdiyini söylədi. Onun sözlərinə görə, belə görüşlər münasibətlərin humanitar və institusional əsaslarını daha da möhkəmləndirir.

Senator Kristian-Avqustin Nikulesku-Tağârlaş çıxışında Rumıniya Parlamentinin prezidenti Mircea Abrudeanın Azərbaycana olan son rəsmi səfərinə toxundu. O, bu görüşü ölkələr arasında strateji əməkdaşlığın yüksək səviyyədə inkişaf etməsinin aydın təzahürü kimi qiymətləndirdi. Danışıqlarda Cənubi Qafqazda sülh təşəbbüsləri, parlamentlərarası dostluq qrupunun işi, enerji və media diplomatiyası kimi mövzular ətrafında fikir mübadiləsi aparıldı. Tərəflər informasiya məsuliyyətinin artırılması və təbliğata qarşı mübarizə yollarını da müzakirə etdilər. Senator yekunda bildirdi ki, Rumıniya və Azərbaycan arasındakı hüquqi və media əməkdaşlığı Avropa İttifaqı ilə Cənubi Qafqaz arasında strateji tərəfdaşlığın möhkəmlənməsinə böyük töhfə verəcək. Görüşdə gələcəkdə bu istiqamətdə birgə təşəbbüslər həyata keçirmək barədə razılıq əldə olundu.