Rumıniyanın müdafiə naziri istefa verib

Rumıniyanın müdafiə naziri Yonuts Moşteanu təhsili ilə əlaqədar yaranan qalmaqal səbəbindən tutduğu vəzifədən ayrıldı. O, öz qərarını izah edərkən, illər əvvəl buraxdığı səhvlərin və təhsilinin hazırda ölkəni idarə edənlərin diqqətini yayındırmasını istəmədiyini vurğulayıb. Nazirin istefası, ictimai fiqurların bioqrafiyalarında olan məlumatların doğruluğu mövzusunu yenidən gündəmə gətirdi.

KİV-lərin yazdığına görə, Moşteanunun rəsmi tərcümeyi-halında yanlış məlumat göstərilmişdi. O, Buxarestdəki Athenaeum Universitetində təhsil aldığını iddia edirdi. Həmin sənədlərdə qeyd olunurdu ki, gələcək müdafiə naziri hələ 90-cı illərin sonunda “menecment” ixtisası üzrə diplom əldə edib.

Lakin aparılan araşdırmalar bu məlumatları təkzib etdi. Bir jurnalistin sorğusuna əsasən, həmin ali təhsil ocağı belə bir tələbənin heç vaxt onlarda oxumadığını bildirdi. Məhz bu təhsil qalmaqalı Moşteanunun vəzifəsindən kənarlaşmasına səbəb oldu.