Rusiya ordusu Ukraynanın Xarkov vilayətinə zərbələr endirib, ölənlər və yaralılar var

Ukraynanın Xarkov vilayətinin Balakliya şəhərinə Rusiya tərəfindən bir gecədə endirilən raket zərbələri ciddi itkilərə səbəb oldu. Hücum nəticəsində 3 nəfər həlak olub, 10 nəfər yaralanıb. Bu barədə Balakliya Şəhər Hərbi İdarəsinin rəisi Vitali Karabanov məlumat yayıb. Onun Telegram kanalında verdiyi açıqlamaya görə, zərbələr mülki infrastruktura dəyib və kütləvi xəsarətlərə yol açıb.

Karabanov xəsarət alanlar arasında 3 uşağın olduğunu bildirib. Yaralanan 10 nəfərdən 9-u dərhal xəstəxanaya yerləşdirilib, bir şəxs isə ambulator müalicə alır. Hər kəsə lazımi tibbi yardım göstərilir. Hadisə yerində xilasedicilər, tibb işçiləri və fövqəladə hallar xidməti işlərini davam etdirir. Ərazidən hələ də mümkün itkilərlə bağlı zənglər gəlməkdədir. Əməliyyat qrupları zərbələrin dəqiq nəticələrini öyrənməyə çalışır.