"Sabah"ın baş məşqçisi: "Rotasiya olmadan Çempionlar Liqasında qələbə qazanmaq çətindir"

“Sabah” basketbol klubunun baş məşqçisi Rimas Kurtinaytis FIBA Çempionlar Liqasının əsas mərhələsinin matçlarında rotasiya olmadan qələbə qazanmağın çox çətin olduğunu bildirib. Mütəxəssis bu fikirləri səfərdə Fransa təmsilçisi “Elan Şalon”a 71:84 hesabı ilə uduzduqları qarşılaşmadan sonra səsləndirib.

Kurtinaytis qeyd edib ki, səfərdə oynamaq hər zaman çətinlik yaradır, çünki ev sahibi komandanın üstünlüyü olur. O deyib ki, komanda oyuna yaxşı başlamasa da, sonradan vəziyyəti düzəltməyi bacarıb. Lakin baş məşqçi əvvəlki fikirlərini təkrarlamalı olduğunu vurğulayıb: məhdud rotasiya imkanları ilə bu cür gərgin oyunlarda uğur qazanmaq çətin görünür. O əlavə edib ki, ehtiyatda Endər Poladxanlı kimi hazır oyunçuya ehtiyacları var.

Dəyişiklik imkanlarının məhdud olması dördüncü periodda komandanın aqressiv oyun baxımından geri qalmasına səbəb olur. R.Kurtinaytisin sözlərinə görə, oyunçular sona yaxın yorulur, bu da onlara lazım olan atışların qeyri-dəqiq yerinə yetirilməsi ilə nəticələnir. Buna baxmayaraq, baş məşqçi oyunçulara irad bildirməyib, çünki onların hər biri meydanda tam gücünü ortaya qoyub. “Sabah”ın rəhbəri ümid edir ki, qələbəyə sevinmək növbəsi tezliklə onlara da çatacaq. O qeyd edib ki, bu istiqamətdə işlər görülür, lakin komandanın formalaşması üçün vaxt lazımdır.

Qeyd edək ki, "Sabah" bu məğlubiyyətdən əvvəl də Çempionlar Liqasında iki görüşdə uduzmuşdu. Komanda Çexiya təmsilçisi "Nimburk"a (65:93) və Almaniyanın "Alba" (76:85) komandalarına məğlub olmuşdu.