Sanitariya-Karantin Mərkəzinin sabiq vəzifəli şəxslərinə hökm oxunub

Səhiyyə Nazirliyinin Respublika Sanitariya-Karantin Mərkəzinin sabiq baş direktoru Saleh Novruzi, direktor müavini Yadulla Balışov və Laboratoriya şöbəsinin müdiri Tahir Vəliyevin cinayət işi üzrə yekun məhkəmə prosesi başa çatıb. Bakı Ağır Cinayətlər Məhkəməsində hakim Rasim Sadıxovun sədrliyi ilə keçirilən bu prosesdə hökm oxunub. Məhkəmənin qərarına əsasən, hər üç təqsirləndirilən şəxs - Saleh Novruzi, Tahir Vəliyev və Yadulla Balışov 9 il müddətinə azadlıqdan məhrum ediliblər. Lakin təqsirləndirilənlərin yaşı və səhhəti nəzərə alınaraq Cinayət Məcəlləsinin 70-ci maddəsi tətbiq olunub. Bu maddə ilə onların cəzası şərti seçilərək 5 il sınaq müddəti müəyyən edilib. Qeyd etmək lazımdır ki, dövlət ittihamçısı əvvəlcə Saleh Novruzi və Tahir Vəliyev üçün 10 il, Yadulla Balışov üçün isə 10 il 6 ay həbs cəzası istəmişdi.

Bu şəxslər ötən ilin may ayında Baş prokuror yanında Korrupsiyaya qarşı Mübarizə Baş İdarəsinin keçirdiyi əməliyyat-axtarış tədbirləri nəticəsində yaxalanmışdılar. Əməliyyat-istintaq tədbirləri ilə müəyyən edilmişdi ki, həmin şəxslər qabaqcadan əlbir olaraq qanunsuz hərəkətlər ediblər. Onlar idxal və daxili istehsal məhsullarının gigiyenik sertifikatlaşdırılması müqabilində mərkəzə müraciət edən ayrı-ayrı vətəndaşlardan külli miqdarda pul vəsaitlərini rüşvət qismində alıblar. Bu zaman heç bir müayinə məqsədli nümunə götürülməyib. Fakt üzrə Baş İdarədə Cinayət Məcəlləsinin müvafiq maddələri ilə cinayət işi başlanmışdı.

Aparılan axtarışlar zamanı qeyd edilən vəzifəli şəxslərin xidməti otaqlarında və digər ünvanlarda iş üzrə əhəmiyyət daşıyan sənədlər və başqa sübutlar tapılıb. İlkin sübutlar əsasında Saleh Novruzi, Yadulla Balışov və Tahir Vəliyev təqsirləndirilən şəxs qismində cəlb ediliblər. Onlar Cinayət Məcəlləsinin 311.3.1, 311.3.2, 311.3.3 (qabaqcadan əlbir olan bir qrup şəxs tərəfindən təkrar və külli miqdarda rüşvət alma) və 308.2-ci (ağır nəticələrə səbəb olan vəzifə səlahiyyətlərindən sui-istifadə) maddələri ilə ittiham olunurdu. İstintaq dövründə, onların yaşı və səhhəti nəzərə alınaraq, barələrində ev dustaqlığı (əsas) və vəzifədən kənarlaşdırma (əlavə) növündə qətimkan tədbirləri seçilmişdi.

Qeyd edək ki, bu məhkəmə prosesi həm də əlavə bir məlumatla yadda qalıb. Bu, hakim Rasim Sadıxovun sədr olaraq oxuduğu sonuncu hökm olub. Hökm oxunduqdan sonra o, təqaüdə çıxacaq.