Səbinə Salmanova: Omanda Azərbaycan səfirliyinin açılması tarixi hadisədir - MÜSAHİBƏ

Milli Məclisin deputatı və Azərbaycan–Oman Sultanlığı parlamentlərarası işçi qrupunun rəhbəri Səbinə Salmanova iki ölkə arasındakı münasibətlərin yüksək səviyyədə olduğunu bildirib. O, Maskat şəhərində Azərbaycan səfirliyinin açılmasını münasibətlərin dərinləşməsi baxımından tarixi hadisə adlandırır. Salmanovanın sözlərinə görə, Azərbaycan Respublikası bütün tərəfdaş ölkələrlə dostluq, qarşılıqlı hörmət və bərabərhüquqlu əməkdaşlıq prinsiplərinə sadiq qalaraq faydalı əlaqələr qurmağa böyük önəm verir. Azərbaycan ilə Oman arasındakı münasibətlər dərin etimad, qarşılıqlı anlaşma və birgə inkişaf istəyini əks etdirir. Oman Azərbaycanın müstəqilliyini tanıyan və diplomatik əlaqələr quran ilk ölkələrdən biri olub. Oman 1991-ci il dekabrın 30-da müstəqilliyi tanıyıb, 1992-ci il iyulun 13-də isə diplomatik əlaqələr qurulub. Prezident İlham Əliyev və Oman Sultanı Heytəm bin Tariq Al Səid ölkələr arasında dostluq münasibətlərinin inkişafına böyük dəyər verirlər. Dövlət başçılarının siyasi iradəsi əlaqələrin strateji tərəfdaşlıq səviyyəsinə yüksəlməsinə, daha sıx və səmərəli işbirliyinin qurulmasına geniş zəmin yaradıb.

Azərbaycan-Oman münasibətləri son dövrdə yeni məzmun qazanıb. Dialoqun fəallaşması, qarşılıqlı səfərlərin artması, iqtisadi və mədəni sahələrdə imzalanan sənədlər bu əlaqələrin yüksələn dinamika ilə inkişaf etdiyini göstərir. Hər iki ölkə sabitlik, müstəqillik, qarşılıqlı hörmət və tərəqqi amilləri ilə birləşir. Onlar beynəlxalq arenada bir-birinin suverenliyinə və ərazi bütövlüyünə dəstək göstərir, qlobal sülhün və təhlükəsizliyin qorunması istiqamətində oxşar mövqe nümayiş etdirirlər. Beynəlxalq təşkilatlar çərçivəsində, xüsusilə BMT, İslam Əməkdaşlıq Təşkilatı (İƏT) və Qoşulmama Hərəkatında (QH) fəal əməkdaşlıq davam edir. Oman Sultanlığı beynəlxalq hüquqa əsaslanan Azərbaycanın mövqeyini dəstəkləyərək beynəlxalq platformalarda bu mövqenin müdafiəsinə töhfə verib. İƏT çərçivəsində hər iki dövlət müsəlman dünyasının həmrəyliyinin gücləndirilməsi və islamofobiya ilə mübarizə sahəsində eyni mövqedən çıxış edir. Azərbaycanın QH-yə sədrliyi dövründə Omanın göstərdiyi dəstək diplomatik həmrəyliyin açıq təzahürüdür.

Əməkdaşlıq yalnız siyasi müstəvi ilə məhdudlaşmır. İqtisadiyyat, ticarət, enerji, mədəniyyət, turizm və təhsil kimi strateji sahələrdə qarşılıqlı maraqlara əsaslanan yeni təşəbbüslər həyata keçirilir. 2024-cü ilin statistik göstəriciləri iqtisadi əlaqələrin yüksələn dinamikasını aydın göstərir. Azərbaycanla Oman Sultanlığı arasında ticarət dövriyyəsinin həcmi 66,57 milyon ABŞ dolları təşkil edib. Bu məbləğin 65,81 milyon ABŞ dolları həcmində müsbət xarici ticarət saldosu Azərbaycanın ixrac potensialının artdığını təsdiqləyir. Gələcəkdə hər iki tərəf bu istiqamətləri daha da şaxələndirməyi, birgə investisiya layihələri və sənaye əməkdaşlığı formatlarını genişləndirməyi planlaşdırır. Turizm sahəsində də əlaqələr inkişaf edir. 2024-cü ildə Omandan Azərbaycana 24 min 140 nəfərin səfər etməsi ölkəmizin turizm infrastrukturunun yüksək səviyyəli olduğunu göstəricisidir. Turist axınının artması xalqlar arasında mədəni yaxınlaşmaya və iqtisadi əlaqələrin dərinləşməsinə mühüm töhfə verir.

Parlamentlərarası əməkdaşlıq dövlətlərarası əlaqələrin inkişafında xüsusi əhəmiyyət daşıyır. Bu il fevralın 3-də Milli Məclisdə Oman Sultanlığı ilə parlamentlərarası əlaqələr üzrə işçi qrupunun yaradılması əhəmiyyətli bir addım oldu. Bu qrupun məqsədi qanunverici orqanlar arasında münasibətləri gücləndirmək, qarşılıqlı təcrübə mübadiləsini təmin etmək və parlament diplomatiyasını inkişaf etdirməkdir. Səbinə Salmanova oktyabrın 20-də Maskat şəhərində Azərbaycan səfirliyinin rəsmi açılış mərasimini iki ölkənin münasibətlərində yeni mərhələ kimi dəyərləndirir. Bu addım siyasi dialoqun institusional əsasda möhkəmlənməsi deməkdir. Əlaqələr artıq birbaşa diplomatik nümayəndəlik vasitəsilə daha operativ və məqsədyönlü şəkildə həyata keçiriləcək. Səfirlik mədəniyyət, elm və təhsil sahələrində əməkdaşlığın da genişlənməsinə xidmət edəcək. Salmanova əmindir ki, Azərbaycan-Oman münasibətləri gələcəkdə də yüksələn xətt üzrə inkişaf edəcək, yeni layihələr və birgə investisiya təşəbbüsləri ilə daha da zənginləşəcək.