Sədr müavini: Ölkəmiz Bakıda keçiriləcək Dünya Şəhərsalma Forumuna aktiv hazırlaşır

Dövlət Şəhərsalma və Arxitektura Komitəsinin sədr müavini İlqar İsbatov ölkənin Bakıda keçiriləcək Dünya Şəhərsalma Forumuna hazırlaşdığını təsdiqləyib. O, bu açıqlamanı ADA Universitetində təşkil edilən “Baku Archifest 2025” memarlıq və şəhərsalma festivalı zamanı verib. İsbatov qeyd edib ki, qarşıdakı ildə Bakı şəhərində bu böyük tədbir baş tutacaq. Ölkəmiz və cəmiyyətimiz bu mühüm foruma aktiv şəkildə hazırlaşır.

Sədr müavini vurğulayıb ki, Azərbaycanda şəhərsalma və quruculuq prosesləri torpaqlar işğaldan azad edildikdən sonra geniş vüsət alıb. Hazırda Azərbaycanın bütün bölgələrində intensiv yenidənqurma işləri həyata keçirilir. Bu işlər xüsusilə də işğaldan azad edilmiş ərazilərdə cəmləşib. Viran edilmiş yaşayış məskənlərimiz – şəhərlərimiz, qəsəbələrimiz, kəndlərimiz – demək olar ki, sıfırdan yenidən qurulur.

Dövlət Şəhərsalma və Arxitektura Komitəsi bu geniş miqyaslı prosesdə çox fəal iştirak edir. Komitə yaşayış məskənlərinin şəhərsalma sənədlərinin, şəhər, qəsəbə və kəndlərin baş planlarının hazırlanmasında fəaldır. Həmçinin, Komitə həmin layihələrin bilavasitə icrasında da vacib rol oynayır.