Şəhid ailələrinin övladlarına kosmos və texnologiya sahəsində qış düşərgəsi təşkil olunur

Şəhid ailələrinin övladlarına kosmos və texnologiya sahəsində biliklər vermək və onlara maraqlı təcrübələr yaşatmaq məqsədi ilə Türkiyənin GUHEM mərkəzində xüsusi bir qış düşərgəsi təşkil olunub. Tədbir 25-30 noyabr tarixlərini əhatə edib. Bu layihə "Azərkosmos"un nəzdində fəaliyyət göstərən KOSMİK Akademiyanın təşkilatçılığı ilə baş tutub. Layihəyə Azərbaycan Milli Antidopinq Agentliyi, "Zəfər" Şəhid Ailələrinə Dəstək İctimai Birliyi və Türkiyənin Kosmik Aviasiya Tədqiqat Mərkəzi (GUHEM) dəstək göstərir.

Düşərgədə Azərbaycanın fərqli bölgələrindən olan 10 şəhid övladı iştirak edir. İştirakçılar burada yüksək texnologiyalar, kosmos, süni intellekt və innovasiya sahələrində praktiki təcrübələr əldə edirlər. Onlar müasir texnoloji alətlərdən istifadə edərək məşğələlərdə yer alırlar. Proqram onlara kosmos və aviasiya bilikləri qazandırmaqla yanaşı, gələcəkdə texnologiya dünyasında öz karyeralarını qurmaq üçün geniş imkanlar açır. GUHEM mərkəzinin yüksək texnologiyalı infrastrukturu gənclərə bu sahələrdə daha dərindən bilik toplamağa və dünya səviyyəli ixtisaslı kadrlar olmağa imkan yaradır.

GUHEM mərkəzi Bursa Ticarət və Sənaye Palatasının rəhbərliyi altında yaradılıb, Bursa Böyükşəhər Bələdiyyəsi və Türkiyənin Elmi və Texnoloji Araşdırmalar Şurası ilə əməkdaşlıq edir. Mərkəzin sahəsi 13,000 kvadratmetrdir. GUHEM kosmos və aviasiya texnologiyalarının inkişafını təşviq edir, rəqəmsallaşma və İKT ekosisteminin inkişafı üçün bir sıra proqramlar həyata keçirir. O, gənc nəsli yüksək texnologiya sahələrində tədqiqata cəlb edərək onların beynəlxalq rəqabət qabiliyyətini artırmağa çalışır. Mərkəzin tərkibində 154 interaktiv mexanizm, Kosmik İnnovasiya Laboratoriyası, Robototexnika Laboratoriyası və digər müasir təhsil imkanları var. Bu cür layihələr şəhid ailələrinin övladlarının yalnız elmi deyil, həm də sosial və mənəvi inkişafı baxımından dəstəklənməsinə, onların gələcəkdə cəmiyyətə fəal və bilikli vətəndaşlar kimi qatılmasına yardım edir.