Şəkidə yol qəzasında 3 nəfər ölüb, 2 nəfər yaralanıb - YENİLƏNİB-1

Şəki rayonunda baş verən ağır yol qəzasında üç nəfər həlak olub, daha iki nəfər isə müxtəlif dərəcəli bədən xəsarətləri alıb. Bu faciəvi hadisə oktyabrın 21-də axşam saat 18:00 radələrində qeydə alınıb. Qəza Qaraməryəm-İsmayıllı-Şəki avtomobil yolunun Şəkinin Oraban kəndi ərazisindən keçən hissəsində baş verib.

Hərəkətdə olan “KİA” və “VAZ-2107” markalı avtomobillər toqquşub. Qəza nəticəsində avtomobillərdə olanlardan üç nəfər aldığı ağır zədələrdən dərhal hadisə yerində ölüb. Xəsarət alan iki nəfər Şəki Rayon Mərkəzi Xəstəxanasının Təcili Tibbi Yardım şöbəsinə yerləşdirilib. TƏBİB-dən verilən məlumata görə, saat 18:30 radələrində xəstəxanaya bir kişi və bir qadın hospitalizasiya olunub.

Yaralılara lazımi tibbi xidmətlər göstərilib və hazırda onların müalicəsi müvafiq şöbələrdə davam etdirilir. Həkimlərin qiymətləndirməsinə görə, bir nəfərin vəziyyəti ağırdır, digər xəsarət alan şəxsin vəziyyəti isə orta ağır olaraq qalır. Daxili İşlər Nazirliyinin Mətbuat Xidmətinin regional qrupu faktı təsdiqləyib. Baş vermiş hadisə ilə bağlı cinayət işi başlanılıb, hazırda hadisənin bütün səbəblərinin araşdırılması aparılır. Ölən və yaralanan şəxslərin kimlikləri dəqiqləşdirilir.