"Shirvan Open 2025" beynəlxalq şahmat festivalına start verilib

"Shirvan Open 2025" beynəlxalq şahmat festivalına start verilib. Bu idman tədbiri Azərbaycan Şahmat Federasiyası, Gənclər və İdman Nazirliyi, həmçinin Şirvan şəhər Olimpiya İdman Kompleksinin birgə təşkilatçılığı ilə həyata keçirilir. Festival 8 ölkədən 240-dan çox şahmatçını bir araya gətirib. Yarışın açılış mərasimi yüksək səviyyədə təşkil olunub.

Açılış mərasimində Şirvan Şəhər İcra Hakimiyyətinin başçısı İlqar Abbasov və Azərbaycan Şahmat Federasiyasının vitse-prezidenti Faiq Həsənov çıxış edərək şahmatçılara uğurlar arzulayıblar. Turnirdə iştirak edən idmançılar A və B qruplarında mübarizə aparırlar. Hər iki qrup üzrə yarışlar İsveçrə sistemi əsasında 9 turdan ibarət olmaqla təşkil edilir. Bu sistem iştirakçıların ədalətli şəraitdə rəqiblərlə qarşılaşmasını təmin edir.

Festivalın cəmi mükafat fondu 22650 AZN təşkil edir. Mükafat bölgüsünə görə, A qrupunun qalibi 5100 AZN qazanacaq. B qrupunda isə birinci yerin sahibi olan şahmatçı 1000 AZN pul mükafatı alacaq. Festival çərçivəsində əsas yarışlarla yanaşı, rapid və blits formatlarında da oyunlar keçirilməsi planlaşdırılır. Bu turnir Azərbaycan Şahmat Federasiyasının "Chess Tour Azerbaijan" layihəsi çərçivəsində təşkil olunan sayca səkkizinci və bu ilin sonuncu festivalıdır. Yarışlara 26 noyabrda yekun vurulacaq.