SHXÇDX rəisi Naxçıvanda vətəndaşları qəbul edib

Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) rəisi general-mayor Mürsəl İbrahimov Naxçıvan Muxtar Respublikasında vətəndaş qəbulu keçirib. Görüş Xidmətin Naxçıvan üzrə baş idarəsinin inzibati binasında baş tutdu. Qəbulda Naxçıvan, Babək, Culfa, Kəngərli, Ordubad, Sədərək, Şahbuz və Şərur şəhər və rayonlarında qeydiyyatda olan sakinlər iştirak etdilər. Qəbuldan əvvəl rəhbərlik ümummilli lider Heydər Əliyevin abidəsini ziyarət edərək önünə gül dəstəsi qoydu, ulu öndərin əziz xatirəsi ehtiramla yad edildi.

Qəbul zamanı cəmi 30 vətəndaşın müraciəti dinlənilib. Müraciət edənlər arasında 2 şəhid ailəsi və 1 müharibə iştirakçısı var idi. Vətəndaşların əsas müraciətləri SHXÇDX-da həqiqi hərbi xidmətə və ya işə qəbul olunma, eləcə də övladlarının gələcək müddətli həqiqi hərbi xidmət yerinin müəyyənləşdirilməsi kimi fərqli məsələlərlə bağlı idi. Xidmət rəisi Mürsəl İbrahimov hər bir vətəndaşın müraciətini diqqətlə dinlədi.

General-mayor İbrahimov qaldırılan məsələlərin tam öyrənilməsi üçün müvafiq tapşırıqlar verdi. O, həmin məsələlərin qanunvericiliyin tələblərinə uyğun gələrək qısa müddətdə həll edilməsi üçün göstərişlər verdi. Vətəndaşların müraciətlərinin bir qismi görüş yerindəcə öz həllini tapdı. Bəzi məsələlər isə əlavə araşdırılma tələb etdiyi üçün nəzarətə götürüldü. SHXÇDX-nın səlahiyyətlərinə aid olmayan müraciətlər isə müvafiq dövlət qurumlarına yönəldildi.