Süni intellekt sosial sahədə reabilitasiya və əlillik xidmətlərinə inteqrasiya olunur - Nazir

Əmək və əhalinin sosial müdafiəsi naziri Anar Əliyev Azərbaycanda sosial sahədə həyata keçirilən elektron keçidlə bağlı mühüm açıqlamalar verib. Nazir "SOCGOV 2025: Süni intellekt insan və transformasiya üçün” adlı beynəlxalq konfransda panel çıxışı zamanı çıxış edib.

Anar Əliyev tam əminliklə bildirib ki, bu gün Azərbaycanda sosial sahədə elektron keçid artıq təmin edilib. O, həmçinin bu keçidin növbəti mərhələlərdə də aktiv şəkildə davam edəcəyini vurğulayıb.

Nazir qeyd edib ki, Nazirlik süni intellektdən istifadəni genişləndirməyi planlaşdırır, çünki bu sahədə geniş imkanlar var. Onun sözlərinə görə, reabilitasiya, əlillik və sosial-psixoloji sahələrdə süni intellektdən geniş istifadə etmək mümkün olacaq. Qarşıda duran əsas məsələlərdən biri də sosial ödənişlərin tamamilə elektron qaydada həyata keçirilməsidir. Nazirlik bu prosesləri inkişaf etdirməyi hədəfləyir.