Suriya hökuməti ABŞ sanksiyalarının yaxın aylarda ləğvini ümid edir

Suriya hökuməti yaxın aylarda ABŞ-nin ölkəyə qarşı tətbiq etdiyi sanksiyaların rəsmən ləğv olunacağına ümid edir. Ölkənin iqtisadiyyat naziri Məhəmməd Nidal əş-Şaar bu barədə oktyabrın 21-də “Reuters” agentliyinə açıqlama verib. Bu bəyanat Vaşinqtonla aparılan yüksək səviyyəli danışıqların ardınca gəlir. Suriya hakimiyyəti hesab edir ki, ABŞ tərəfindən tətbiq edilən bütün iqtisadi məhdudiyyətlərin aradan qaldırılması istiqamətində artıq doğru yol tutulub.

Nazir Əş-Şaarın sözlərinə görə, ABŞ Prezidenti Donald Tramp hələ may ayında Suriya Prezidenti Əhməd əş-Şaraa ilə görüşdən sonra sanksiyaların böyük hissəsinin ləğvi barədə göstəriş vermişdi. Ancaq bu siyasi qərara baxmayaraq, Amerika qanunvericiliyində hələ də mühüm maneələr qalır. Xüsusilə, 2019-cu ildə qəbul edilmiş və Suriyanın mülki əhalisinin müdafiəsini nəzərdə tutan “Sezar Qanunu” ABŞ qanunlarında qüvvədədir. Bu akt sanksiyaların tamamilə götürülməsini çətinləşdirir.

Londonda çıxışı zamanı Əş-Şaar hökumətin mövcud vəziyyəti dəyişmək üçün ciddi səylər göstərməli olduğunu təsdiqlədi. O dedi: “Biz bu istiqamətdə başlanmış düzgün yolu davam etdirmək üçün səylər göstərməli və lobbiçilik aparmalıyıq. Ümid edirik ki, ilin sonuna qədər qanun layihəsi prezidentə təqdim olunacaq və o, sənədi imzalayacaq.” Suriya bu addımla ABŞ sanksiyaları rejimini aradan qaldırmağa çalışır. Bundan başqa, iqtisadi durumu sabitləşdirmək məqsədi güdən daha bir vacib məsələ var. Suriya Prezidenti hökumətin gələn ilin əvvəlində ölkədə tamamilə yeni valyutanın dövriyyəyə buraxılmasını planlaşdırdığını da qeyd edib.