Tovuzda dəmir yolu faciəsi: qatarın vurduğu 17 yaşlı gəncin kimliyi müəyyənləşdi

Tovuzda dəmir yolu xəttinə qəfil çıxaraq qatarın vurması nəticəsində həyatını itirən şəxsin kimliyi müəyyən edilib.

Yerli mənbələrdən daxil olan məlumata görə, həlak olan şəxs Tovuz rayon sakini, 2007-ci il təvəllüdlü Ədalət Nərimanlıdır. Faktla bağlı araşdırmalar davam etdirilir.

***

Hadisənin təfərrüatı və ADY-nin bəyanatı

Məlumatda qeyd edilir ki, faciə bu gün saat 19:30 radələrində qeydə alınıb. Hərəkətdə olan qatar Qovlar-Tovuz sahəsində dəmir yolu xəttinin qadağan olunmuş hissəsindən keçməyə cəhd edən gənci vurub.

“Azərbaycan Dəmir Yolları” QSC-dən bildirilib ki, qatarın qarşısına qəflətən insan çıxıb. Maşinist tərəfindən dərhal təcili tormozlama tətbiq olunsa da, məsafənin az olması səbəbindən toqquşmanın qarşısını almaq mümkün olmayıb, nəticədə həmin şəxs dünyasını dəyişib.

ADY bir daha vətəndaşlara dəmir yolu xətlərini yalnız müəyyən edilmiş piyada keçidlərindən keçməyə, həyatlarını riskə atacaq hərəkətlərdən çəkinməyə çağırış edir. Qaydalara riayət etmək vacibdir və onların pozulması inzibati məsuliyyət yaradır.

***

Hadisə yerinə dərhal polis və prokurorluq əməkdaşları cəlb olunub, faktla bağlı müvafiq araşdırmalara başlanılıb.