Tramp BBC-ni məhkəməyə verməklə hədələyib

ABŞ prezidenti Donald Tramp Böyük Britaniyanın "BBC" yayım korporasiyasını məhkəməyə verəcəyini bildirib. Tramp BBC-dən onun redaktə edilmiş çıxışının yayımını 14 noyabr tarixinə qədər silməyi tələb edir. Əks halda, ABŞ prezidenti telekanala qarşı 1 milyard dollarlıq böyük iddia qaldırılacağını bəyan edib.

Bu xəbəri yayım korporasiyası özü yayıb. Onlar məlumatı ABŞ prezidentinin vəkillərindən gələn rəsmi məktuba istinadən veriblər. Məsələ 2024-cü ilin oktyabr ayında BBC-nin "Panorama" verilişində yayımlanan materialla bağlıdır. Həmin verilişdə Trampın çıxışı elə redaktə edilmişdi ki, tamaşaçılarda onun Kapitol binasının ələ keçirilməsinə çağırış etdiyi təəssüratı yaransın.

Həqiqət isə tamamilə fərqli idi. Əslində, Donald Tramp vətəndaş mövqelərini dinc vasitələrlə ifadə etməyin zəruriliyindən danışırdı. BBC-nin redaktə olunmuş yayımı onun sözlərinin mənasını kökündən dəyişərək siyasi qalmaqala səbəb oldu. Bu səbəbdən teleşirkət rəhbərliyində ciddi dəyişikliklər yaşandı.

Mübahisəli yayımdan sonra teleşirkətin baş icraçı direktoru Tim Deyvi və xəbərlər şöbəsinin rəhbəri Debora Terness istefa vermək məcburiyyətində qaldılar. Donald Trampın 1 milyard dollarlıq təhdidi indi BBC-ni çətin vəziyyətdə qoyur. BBC ya videonu silməli, ya da bu materialın yayımlanmasına görə böyük məhkəmə iddiası riski ilə üzləşməlidir.