Trend və DHA agentlikləri süni intellekt əsaslı rəqəmsal platformaya TDT və D8 ölkələrinin mediasını dəvət edir - Sevil Mikayılova

Trend Beynəlxalq İnformasiya Agentliyi və Türkiyənin tanınmış "Demirören Agentliyi" (DHA) süni intellekt əsaslı rəqəmsal platforma təqdim edib. Bu platformaya Türk Dövlətləri Təşkilatının (TDT) və D8 ölkələrinin media qurumları dəvət edilir. Medianın İnkişafı Agentliyinin Müşahidə Şurasının üzvü, Milli Məclisin deputatı Sevil Mikayılova bu barədə TDT Media Forumu çərçivəsində çıxış edərkən danışıb. Sessiya "Rəqəmsal media mühitində TDT-yə üzv dövlətlərin qarşılıqlı əməkdaşlıq imkanları" mövzusuna həsr olunmuşdu. Mikayılova bildirib ki, Trend və DHA birlikdə çox maraqlı bir layihə ilə çıxış etdi: müasir informasiya texnologiyalarına söykənən və hazırda zəruri olan əməkdaşlığı ehtiva edən yeni bir platforma quruldu. Onlar artıq digər dövlətləri, hətta türkdilli olmayan ölkələri də bu layihəyə qoşublar. Çinin nüfuzlu "Sinxua" Agentliyi də platformaya qoşulmağa razılıq verib.

Deputat platformanın əhəmiyyətini, xüsusilə internet məkanında dezinformasiyanın geniş yayıldığı bir dövrdə vurğulayıb. O, süni intellekt vasitəsilə yaradılan yalan məlumatlara cavab olaraq doğru və dəqiq kontentin mövcud olmasının vacibliyini qeyd edib. Məhz bu məqsədlə həmin platformada bir multimedia stoku formalaşdırılıb. Mikayılova deyib ki, onlar həmçinin süni intellekt vasitəsilə müxtəlif dillərə tərcümə imkanlarını ilk dəfə uğurla tətbiq edərək çox müsbət nəticə əldə ediblər. Bütün türk dövlətlərindən olan həmkarlarımızı da bu platformaya dəvət etmişik. Digər ölkələrdən olan həmkarları cəlb etməklə çox müsbət bir media mühiti formalaşdırıla bilər.

Sevil Mikayılova platformada yalnız dəqiq, ictimaiyyəti düzgün istiqamətləndirən xəbərlərin təqdim ediləcəyini söyləyib. Xəbərin mahiyyətindən asılı olmayaraq, məlumat korrekt və etibarlı qalacaq. O, dövlətlər arasında strateji kommunikasiyanın qurulmasının bu gün çox önəmli olduğunu bildirib. Sosial media və ənənəvi media ictimai şüura təsir baxımından son dərəcə güclü vasitələrdir. Ancaq belə platformaların mövcudluğu, dəqiq informasiya mənbələrinin toplandığı mühitin yaradılması zəruridir. Bu platforma diplomatlar, qərar verən şəxslər və media savadlılığı olan insanlar üçün böyük dəyər daşıyır.

Deputat əlavə edib ki, zaman keçdikcə texnologiyaların inkişafı bu mühitdə daha yüksək səviyyəli media sistemini formalaşdıracaq. Lakin indiki mərhələdə dayana bilmərik. Həm qanunvericilik bazasını möhkəmləndirməli, həm də yeni media hüququnun yaradılması və əməkdaşlıq platformalarının qurulması istiqamətində çalışmalıyıq. Mikayılova bir neçə gün əvvəl Bakıda D8 ölkələrinin Media Forumunun keçirildiyini xatırladıb. O qeyd etdi ki, dövlətin apardığı siyasi xətti ideoloji baxımdan möhkəmləndirmək üçün bu cür forumlara ciddi ehtiyac var. Digər ölkələri platformaya cəlb etməklə, coğrafiyamızda dəqiq informasiyanın əhatə dairəsini genişləndirə bilərik. Beləliklə, fake news və dezinformasiya ilə mübarizədə effektiv bir sədd yaratmaq mümkündür. Bu, bütün media həmkarları üçün faydalı bir addım olacaq.