Türkiyə Azərbaycanın yanında olmağa davam edəcək - Yaşar Güler

Türkiyə milli müdafiə naziri Yaşar Güler Azərbaycanın 8 Noyabr - Zəfər Günü və 9 Noyabr - Dövlət Bayrağı Günü münasibətilə keçirilən qəbulda çıxış edib. Nazir çıxışında şanlı Azərbaycan ordusunun qəhrəman əsgərlərinin Qarabağı işğaldan azad etmək üçün möhtəşəm bir mübarizə apardığını qeyd etdi.

Yaşar Güler iki ölkə arasındakı qardaşlığın dərin köklü və ortaq keçmişin mirası olduğunu vurğulayıb. Bu münasibətlər bu günümüzü mənalı edir və gələcək üçün birliyi təsdiqləyir. Nazir əlavə edib ki, Türkiyənin gücü Azərbaycanın gücüdür, Azərbaycanın gücü isə Türkiyənin gücüdür.

Nazir Türkiyənin dəstəyinin davamlı olacağını bildirdi. O qeyd edib ki, Türkiyə həmişə olduğu kimi, bu gün də, sabah da Azərbaycanın haqlı mübarizəsində, təhlükəsizliyində və rifahında yanında olmağa davam edəcək.