Türkiyə Hərbi Hava Qüvvələri ilk dəfə Estoniyanın səmasını qoruyacaq

Türkiyə Hərbi Hava Qüvvələrinə məxsus təyyarələr gələn ilin payızında Baltikyanı ölkələrin hava məkanını qorumaq üçün ilk dəfə Estoniyaya gələcək. Bu məlumatı Estoniyanın Xarici İşlər Nazirliyi yayıb. Təyyarələrin gəlişi NATO-nun şərq cinahının müdafiəsində Türkiyənin fəal iştirakını nümayiş etdirir.

Estoniyanın xarici işlər naziri Marqus Tsahkna Ankarada türkiyəli həmkarı Hakan Fidan və Türkiyə Böyük Millət Məclisinin Xarici İşlər Komitəsinin sədri Fuat Oktay ilə görüşdən sonra açıqlama verib. M. Tsahkna bildirib ki, Türkiyə NATO-nun şərq cinahının müdafiəsində fəal rol oynayır. O əlavə edib ki, biz Türkiyə təyyarələrinin növbəti ilin payızında Əmari hava bazasında Baltik ölkələrinin hava məkanının mühafizəsi missiyasına başlayacağını gözləyirik. Bu, regional təhlükəsizliyin gücləndirilməsi üçün NATO missiyası çərçivəsində atılan mühüm addımdır.

M. Tsahkna diplomatik münasibətlərə toxunaraq Estoniyanın Aİ-nin genişlənmə siyasətinə sadiq qaldığını qeyd edib. Estoniya Xarici İşlər Naziri Aİ ilə Türkiyə arasında konstruktiv dialoqun inkişafına, o cümlədən gömrük ittifaqının modernləşdirilməsi kimi məsələlərə dəstəyini ifadə edib. Tsahkna hesab edir ki, bu dialoq tərəflər arasındakı əlaqələri daha da möhkəmləndirəcək.

Estoniyanın xarici işlər naziri Türkiyə ilə Avropa İttifaqı arasında daha sıx əməkdaşlığın əhəmiyyətini vurğulayıb. Onun sözlərinə görə, bu əməkdaşlığın dərinləşməsi bütün Avropanın müdafiə qabiliyyətinin güclənməsinə kömək edəcək. Türkiyənin hərbi təyyarələrinin Estoniyaya göndərilməsi həm hərbi, həm də siyasi səviyyədə ittifaq daxilindəki birlik mesajıdır.