Ümumtəhsildə media savadlılığı ilə bağlı müəllimlər üçün TOT seminarı keçilib

Medianın İnkişafı Agentliyi və Elm və Təhsil Nazirliyi "Media Savadlılığı" Həftəsinə hazırlıq məqsədilə müəllimlər üçün TOT seminarı təşkil etdi. Bu təlimin əsas məqsədi ümumtəhsildə media savadlılığının əhatə dairəsini genişləndirməkdir. Agentlik 2022-ci ildən bəri mütəmadi olaraq belə seminarlar keçirir. Bu tədbirlər media savadlılığını artırmağa, dezinformasiyaya qarşı mübarizəni gücləndirməyə və bu sahədə görülən işlərin səmərəliliyini yüksəltməyə yönəlib.

Elm və Təhsil Nazirliyinin Məktəbəqədər və ümumi təhsil şöbəsinin müdir müavini Nəriman Qəhrəmanlı və Təhsil İnstitutunun Dil fənlərinin proqramları şöbəsinin müdiri Turan Zəkəriyayeva müasir dövrdə informasiya bolluğunun istehlakçılar üçün ciddi risklər yaratdığını qeyd etdilər. Onlar xüsusi vurğuladılar ki, yeniyetmələr və məktəblilər həssas auditoriyadır. Buna görə də onların doğru və yalan informasiyanı ayırd etmə bacarıqlarının inkişaf etdirilməsi böyük əhəmiyyət daşıyır. Bu iş, məktəblilərin məsuliyyətli və səriştəli media istehlakçısı kimi yetişməsinə yardım edəcək.

Seminar çərçivəsində Bakı Dövlət Universitetinin (BDU) mütəxəssisləri də çıxış etdilər. BDU-nun Yeni media və kommunikasiya nəzəriyyəsi kafedrasının müdiri Xatirə Hüseynova informasiya mühitində manipulyativ məzmunların tapılması, mənbələrin etibarlılığının yoxlanılması və xəbərlərin dəqiqliyinin qiymətləndirilməsi haqqında müzakirəyə rəhbərlik etdi. Kafedranın dosenti Könül Niftəliyeva "Media savadlılığının tədrisi: metodika və effektiv yanaşmalar" mövzusunda təqdimatla çıxış etdi. O, pedaqoji yanaşmaları yeniləməyin, həmçinin şagirdlərin analitik düşünmə və məlumatları düzgün qiymətləndirmə bacarıqlarının inkişafına xidmət edən dərs modellərini tətbiq etməyin vacibliyini dilə gətirdi.

Daha sonra "Mediada rəqəmsal izlər: istehsalçı və istehlakçı davranışı" mövzusunda ayrıca sessiya təşkil edildi. "Report" İnformasiya Agentliyinin direktoru Fuad Hüseynəliyev "rəqəmsal iz" anlayışının mahiyyətindən və onun media savadlılığının tərkib hissəsi kimi dəyərindən danışdı. O qeyd etdi ki, media ekosistemində hər bir istifadəçi təkcə məlumat istehlakçısı deyil, həm də onu istehsal edən kimi çıxış edir. Bu vəziyyət rəqəmsal məsuliyyət anlayışını ön plana çıxarır.

Tədbirdə beynəlxalq mütəxəssis Tiffany J. Bell də iştirak etdi. ABŞ, Çin və digər ölkələrdə fəaliyyət göstərmiş mütəxəssis "Yanlış narrativlərin aşkarlanması və mediada mesajları anlama" mövzusunda çıxış etdi. O, dezinformasiya məzmunlarını necə aşkar etmək, rəqəmsal mühitdə düzgün informasiya istehlakçısı olmaq yollarını və media mesajlarının ictimai rəyin formalaşmasına təsir mexanizmlərini izah etdi. Bakı Psixologiya Mərkəzinin uzman psixoloqu Nərmin Osmanlı isə sosial medianın yeniyetmə və gənclərə psixoloji təsirlərini diqqətə çatdırdı. O, media savadlılığının tədrisi zamanı psixoloji faktorların nəzərə alınması, informasiyanın təsirlərinə qarşı dayanıqlılığın artırılması və psixoloji yanaşmaların tədris prosesinə daxil edilməsinin əhəmiyyətli olduğunu bildirdi.