UNEC-də Azərbaycan Milli Elmlər Akademiyasının 80 illik yubileyi qeyd olunub (FOTO)

Azərbaycan Dövlət İqtisad Universitetində (UNEC) Azərbaycan Milli Elmlər Akademiyasının (AMEA) 80 illik yubileyi münasibətilə böyük tədbir keçirilib. Tədbirin rəsmi hissəsindən əvvəl iştirakçılar Ümummilli Lider Heydər Əliyevin büstü önünə gül dəstələri qoyaraq, Ulu Öndərin xatirəsinə hörmətlərini göstərdilər. Onlar daha sonra AMEA-nın 80 illiyinə həsr olunmuş kitab sərgisi ilə tanış oldular.

Rəsmi açılış zamanı Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad edildi, ardınca Dövlət Himni səsləndirildi. UNEC-in rektoru, professor Ədalət Muradov tədbirin açılışında bütün elmi ictimaiyyəti yubiley münasibətilə təbrik etdi. Rektor qeyd etdi ki, Akademiyanın 80 illiyi sadəcə bir yubiley deyil, Vətənə elmlə xidmətin, milli düşüncənin və intellektual gücün təntənəsidir. O, AMEA-nı elmin milli məbədi adlandırdı. Bu məbəd yalnız tədqiqatların aparıldığı yer deyil, eyni zamanda elmə inamın və düşüncəyə hörmətin rəmzidir, deyə rektor bildirdi.

Professor Ədalət Muradov Heydər Əliyevin uzaqgörən siyasəti sayəsində AMEA-nın Azərbaycanın intellektual dayağı və beyin mərkəzi kimi formalaşdığını vurğulayıb. Bu uğurlu siyasət Azərbaycan elminin yeni bir inkişaf mərhələsinə keçməsinə səbəb oldu. Rektorun sözlərinə görə, Prezident İlham Əliyevin rəhbərliyi altında elmin inkişafı dövlətin əsas istiqamətlərindən birinə çevrilib. Elmi tədqiqatların rəqəmsallaşdırılması, yeni ideyaların dəstəklənməsi, gənc alimlərin inkişafı proqramları elmi müasir tələblərə uyğunlaşdırmağa kömək edir. Rektor Birinci vitse-prezident, Heydər Əliyev Fondunun prezidenti Mehriban Əliyevanın da ölkə elminin inkişafında xüsusi xidmətlərini qeyd etdi.

Ədalət Muradov həmçinin AMEA və UNEC arasında baş tutan elmi əməkdaşlığın uğurlu nəticələrindən danışdı. O bildirdi ki, son beş ildə UNEC və AMEA alimlərinin birgə işlədiyi 333 elmi əsər Scopus və Web of Science kimi beynəlxalq bazalarda dərc edilib. Bu əsərlərə ümumilikdə 2050 istinad edilib.

AMEA-nın prezidenti, akademik İsa Həbibbəyli çıxışında ölkə Prezidenti İlham Əliyevin sərəncamı ilə yubileyin dövlət səviyyəsində qeyd edilməsini elmə verilən yüksək dəyər kimi qiymətləndirdi. Akademik bu sərəncamın Azərbaycan elminə, alimlərinə, ziyalılarına göstərilən böyük hörmətin və dövlətin intellektual qüvvələrə olan etimadının təzahürü olduğunu dedi. İsa Həbibəyli akademiyanın zəngin tarixindən danışaraq, bu elm məbədinin yarandığı ilk gündən respublikanın elmi-intellektual potensialını formalaşdırmaqda və elmi düşüncəni inkişaf etdirməkdə xüsusi işlər gördüyünü vurğuladı.

O, elmi və intellektual dəyərlərin cəmiyyətin davamlı inkişafının əsası olduğunu qeyd etdi. Akademikə görə, əgər elm və bilik cəmiyyətin inkişafına xidmət etməzsə, bu, gələcək nəsillərin potensialını itirmək deməkdir. Tədbirdə AMEA-nın Riyaziyyat və Mexanika İnstitutunun direktoru, professor Misir Mərdanov və millət vəkili, akademik Ziyad Səmədzadə də çıxış etdilər. Onlar Akademiyanın Azərbaycanın elmi düşüncə tarixində silinməz izlər qoyduğunu və elmin strateji inkişaf yollarının müəyyənləşdirilməsində bu gün də mühüm işlər gördüyünü bildirdilər.