Vüsal Qurbanov: "Süni intellekt əsaslı nəzarət sığortanın yeni standartları olacaq"

Azərbaycan Mərkəzi Bankının (AMB) Baş direktoru Vüsal Qurbanov sığorta sektorunun gələcək standartları haqqında mühüm açıqlama verib. O, Bakıda keçirilən "Türk Dövlətləri InsurTech Sammiti 2025" tədbirində bildirib ki, süni intellekt əsaslı nəzarət modelləri yaxın gələcəkdə sığortanın yeni standartlarına çevriləcək. Bu dəyişikliklər sektorda xidmətlərin daha dəqiq, ədalətli və çevik olmasını hədəfləyir.

Qurbanovun sözlərinə görə, data mühəndisliyinə əsaslanan avtomatlaşdırılmış qiymətləndirmələr sığortaçılara fəaliyyətlərini yaxşılaşdırmaq üçün geniş imkanlar yaradır. Bu yeniliklər müştəri loyalığını artırır, əməliyyat xərclərini azaldır və sığortanın davamlı inkişafına töhvə verir. Requlyator olaraq AMB Azərbaycanın sığorta bazarında "Inshurtech"lərin tətbiqini, tənzimləyici "sandbox" rejimlərini və rəqəmsal transformasiyanın yerli, qlobal bazarlara təsirlərini daim diqqət mərkəzində saxlayır.

AMB rəsmisi əlavə edib ki, əsas məqsəd beynəlxalq trendləri izləməklə bərabər, onları yerli reallıqlara uyğunlaşdıraraq ölkəmizdə tətbiq etmək üçün sığorta sektoruna şərait yaratmaqdır. Eyni zamanda, istehlakçıların tələblərinə uyğun sığorta məhsullarına çıxışını təmin etmək də hədəflənir. Bildirilib ki, rəqəmsal identifikasiya, onlayn satış platformaları, avtomatlaşdırılmış zərər qiymətləndirmə sistemləri və süni intellekt əsaslı nəzarət modelləri bu sahədə yeni standartlar yaradacaq.