"WhatsApp"da ləqəb üzrə axtarışı funksiyası istifadəyə verilib

Məşhur mesajlaşma tətbiqi "WhatsApp" istifadəçilərə yeni bir funksiyanı təqdim edib. Artıq tətbiqdə istifadəçiləri yalnız ləqəb (nik) vasitəsilə tapmaq və onlara zəng etmək mümkün olacaq. Bu yeniləmə ilə artıq şəxsin nömrəsinə ehtiyac qalmadan digər istifadəçilərlə əlaqə qurmaq olur.

Bildirilir ki, bu əlavə xüsusiyyət telefon nömrələrinin məxfiliyini qorumaqla istifadəçilərin əlaqə yaratmasını xeyli asanlaşdırır. Əvvəllər şəxslə əlaqə yaratmaq üçün mütləq onun mobil nömrəsi lazım idi, lakin indi ləqəb axtarışı sayəsində bu məlumatın gizli saxlanması mümkün olur. Bu, xüsusilə tanımadığınız şəxslərlə qısa müddətli əlaqələr qurarkən mühüm bir üstünlükdür.

Bu yeni funksiya rəqib platformada, yəni "Telegram"da mövcud olan oxşar xüsusiyyətə bənzəyir. Məlumatlara görə, "WhatsApp"ın yeni axtarış sistemi yaxın vaxtlarda bütün platforma istifadəçiləri üçün əlçatan olacaq.