WUF13 inklüziv şəhər siyasətlərinin təşviqinə geniş imkan yaradacaq - Anar Quliyev (FOTO)

Azərbaycan Respublikası Dövlət Şəhərsalma və Arxitektura Komitəsinin sədri Anar Quliyev hazırda Belem şəhərində keçirilən COP30 çərçivəsində bir sıra vacib tədbirlərdə iştirak edir. Noyabrın 14-də Komitə sədri “İqlim fəaliyyəti evdən başlayır: Dəyişən iqlimdə mənzil təminatı” mövzusunda çıxış etdi. O, əlverişli və davamlı mənzil təminatının insan hüquqlarının qorunması, iqlimə qarşı dayanıqlılıq və inklüziv inkişaf üçün əhəmiyyətli olduğunu vurğulayıb.

Qeyd edildi ki, mənzillər həm iqlim dəyişikliyindən təsirlənir, həm də bu dəyişikliyə təsir göstərir. Bu səbəbdən şəhərsalma və tikinti proseslərində ətraf mühitə olan təsirlər minimuma endirilməlidir. Eyni zamanda bu proseslər icmaların rifahını artırmağı hədəfləməlidir. Azərbaycan BMT-nin “Hər Kəs üçün Münasib Mənzil” qətnaməsi üzrə Hökumətlərarası İşçi Qrupun həmsədridir. Bu rolu sayəsində ölkə iqlim aspektlərinin qlobal mənzil prinsiplərinə daxil edilməsini təmin edəcək.

Anar Quliyev növbəti il Bakıda keçiriləcək 13-cü Ümumdünya Şəhərsalma Forumunun (WUF13) əsas planlarını açıqladı. O bildirdi ki, Forum mənzil məsələsini iqlim dayanıqlılığı və sosial inklüzivlik üzrə siyasətlərin əsas komponenti kimi prioritetləşdirəcək. WUF13 həm aşağı karbonlu, həm də davamlı tikinti təcrübələrinin genişləndirilməsinə, eləcə də inklüziv şəhər siyasətlərinin təşviqinə imkan yaradacaq. Tədbir həmçinin Azərbaycanın müasir şəhərsalma təşəbbüslərinin təqdimatına xidmət edəcək. Buraya Bakının insanmərkəzli və iqlimə davamlı Baş planı, azad edilmiş ərazilərdə həyata keçirilən "Böyük Qayıdış" proqramı və əlçatan mənzil layihələri daxildir.

Komitə sədri başqa bir yan tədbirdə – “Bakı Davamlılıq Koalisiyası: Mənzil və iqlim həllərinə gedən yol” iclasında Koalisiyanın qlobal əməkdaşlıqdakı rolunu vurğuladı. Bu Koalisiya COP29 zamanı təsis edilib və iqlimə davamlı, insanmərkəzli şəhərsalma üzrə fəaliyyət göstərir. Koalisiyanın əsas iştirakçıları COP və WUF-lara ev sahibliyi edən Misir, BƏƏ, Azərbaycan və Braziliyadır. Təşkilat kommunikasiya, uğurlu layihələrin təqdimatı və nazirlər səviyyəsində daimi dialoq üzrə işləyir. Anar Quliyev Koalisiya vasitəsilə gücləndirilmiş koordinasiyanın WUF13 çərçivəsində qlobal öhdəliklərin yerli icrasını sürətləndirəcəyinə inandığını dedi. O, bu işin təhlükəsiz, inklüziv və davamlı şəhərlərin qurulmasına böyük töhfə verəcəyini qeyd etdi. WUF13 üzrə milli koordinator kimi Anar Quliyev bütün iştirakçıları gələn il Bakıda keçiriləcək Foruma dəvət etdi.