Xaçmaz rayonunun Yergüc kəndində növbəti səyyar qəbul keçirilib (FOTO)

Xaçmaz Rayon İcra Hakimiyyətinin başçısı Elnur Rzayev yerli hüquq mühafizə orqanları, idarə, müəssisə və təşkilat rəhbərlərinin iştirakı ilə Yergüc kəndində növbəti səyyar qəbulunu həyata keçirib. Bu görüşdə Yergüc İnzibati Ərazi Dairəsi üzrə nümayəndəliyə daxil olan Yergüc, Sərkərli, Armudpadar, Padar, Üçgünqışlaq və Üryanoba kəndlərinin sakinləri iştirak ediblər. Səyyar qəbulun məqsədi sakinləri narahat edən məsələləri yerində eşitmək və onların həlli yollarını tapmaqdan ibarət idi.

Qəbul zamanı sakinlər fərqli istiqamətlərdə müraciətlər səsləndiriblər. Onlar əvvəlki görüşlərdə qaldırılan bəzi məsələlərin həlli ilə bağlı görülən işlərə görə təşəkkürlərini bildirdilər. Eyni zamanda, həlli vacib olan yeni təkliflər və problemlər irəli sürüldü. Əsas müraciətlər su təchizatının yaxşılaşdırılması, yeni salınan yaşayış massivlərinin qazlaşdırılması və torpaq sahələrinin sənədləşdirilməsi ilə bağlı idi. Bu müraciətlər kənd sakinlərinin gündəlik həyatı üçün böyük əhəmiyyət daşıyır.

Rayon İcra Hakimiyyətinin başçısı Elnur Rzayev kənd sakinlərinin bütün arzu və təkliflərini böyük diqqətlə dinlədi. O, vətəndaşları narahat edən problemlərin aradan qaldırılması istiqamətində müvafiq tapşırıqlarını verdi. Sevindirici haldır ki, müraciətlərin xeyli hissəsi yerindəcə həll edildi. Sakinlər əhalinin problemlərinin həll edilməsi məqsədilə yerlərdə həyata keçirilən bu tədbirlərə, göstərilən yüksək diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban Əliyevaya minnətdarlıqlarını ifadə etdilər.