Xaçmazda aşkarlanan Qara kərkəs xilas edilərək aidiyyəti üzrə təhvil verilib

Qara kərkəs, Xaçmaz şəhəri ərazisində şam ağacında aşkar ediləndən sonra xilas olunaraq aidiyyəti üzrə təhvil verilib. Hadisə şəhərin Nəriman Nərimanov küçəsində baş verib. Avtomobil yolunun kənarındakı şam ağacında böyük bir quş olduğunu görən yerli sakinlər dərhal aidiyyəti qurumları məlumatlandırıblar.

Sakinlər quşu gördükdən sonra Ekologiya və Təbii Sərvətlər Nazirliyinin yerli qurumuna və Fövqəladə Hallar Nazirliyinin (FHN) qaynar xəttinə məlumat veriblər. Bildirişdən sonra əraziyə FHN-in xilasediciləri və ekoloqlar cəlb edilib. Təhlükəsizlik tədbiri olaraq, yolda avtomobillərin hərəkəti müvəqqəti olaraq məhdudlaşdırılıb. Aparılan yoxlama zamanı bu quşun Qara kərkəs olduğu müəyyənləşdirilib.

Xilasedicilər quşu şam ağacından götürərək onu təhlükəsiz şəkildə çıxarıblar. Daha sonra quş 5 saylı Regional Ekologiya və Təbii Sərvətlər İdarəsinin əməkdaşlarına təhvil verilib. Beləliklə, nadir quş növünün nümayəndəsi olan bu kərkəs mütəxəssislərin nəzarəti altında saxlanacaq.