Xankəndidə mənzillər satışa çıxarılacaq

Xankəndi şəhərində sahibkarlar tərəfindən tikilən çoxmənzilli binalardakı evlər tezliklə satışa çıxarılacaq. Bu barədə Azərbaycan Respublikası Prezidentinin Xankəndi şəhərində, Ağdərə və Xocalı rayonlarında xüsusi nümayəndəsi Elçin Yusubov məlumat verib. Onun sözlərinə görə, şəhərdə genişmiqyaslı tikinti və bərpa işləri sürətlə davam edir, sahibkarlar çoxmənzilli yaşayış binalarının inşasına başlayıblar. Bu işlər Xankəndini müasir yaşayış məkanına çevirməyi hədəfləyir.

Hazırda şəhərdə və ətraf yaşayış məntəqələrində böyük həcmdə tikinti-bərpa işləri aparılır. Regionda sahibkarlar üçün cəlbedici investisiya mühiti yaradılıb. İnfrastruktur layihələri iş adamlarının bu ərazilərə marağını xeyli artırıb. Xüsusi nümayəndə bildirib ki, sahibkarlar tərəfindən hündürmərtəbəli çoxmənzilli yaşayış binalarının tikintisi başa çatdıqdan sonra mənzillər satışa təqdim ediləcək.

Elçin Yusubov artıq Xankəndidən mənzil almaq istəyən vətəndaşlardan çoxlu müraciətin daxil olduğunu qeyd edib. Mənzillərin satışı həm nəğd ödənişlə, həm də kreditlə mümkün olacaq. O qeyd edib ki, sahibkarların banklarla imzaladığı müqavilələr əsasında vətəndaşlara kreditlə ev əldə etmək imkanı veriləcək. Bu alqı-satqı prosesinin şəffaf və asan şəkildə həyata keçməsi üçün sahibkarlara lazımi dövlət dəstəyi göstəriləcək.