YARAT Müasir İncəsənət Mərkəzində “Ex Africa semper aliquid novi” adlı qrup sərgisinin açılışı keçiriləcək (FOTO)

YARAT Müasir İncəsənət Mərkəzində 27 noyabr saat 19:00-da Afrikanın çağdaş incəsənətinə həsr olunmuş “Ex Africa semper aliquid novi” adlı qrup sərgisinin açılışı keçiriləcək. Alfons Huqun kuratorluğu ilə təşkil edilən bu genişmiqyaslı sərgi Afrika qitəsinin müxtəlif bölgələrindən on bir sayılıb-seçilən rəssamı bir araya gətirir. Layihə Afrikanın unikal, qeyri-adi incəsənət müxtəlifliyini araşdırır. Sərgi bu qitənin müasir dünyanın simasını formalaşdıran mədəni, siyasi və estetik narrativlər yaratmaqda davam etdiyini göstərir.

Böyük Plininin “Təbiət tarixi” əsərində yazdığı kimi, Afrikadan hər zaman hansısa bir yenilik ortaya çıxır. Əsrlər boyu bu qitə bəşəriyyətin beşiyindən tutmuş imperializm, köləlik, müstəmləkəçilik və azadlıq kimi ən mürəkkəb dövrlərə qədər bütün qlobal dəyişikliklərin təkanverici qüvvəsi olmuşdur. Onun mədəni izləri coğrafi sərhədləri aşaraq Avropanın incəsənət tarixində, caz musiqisində, ədəbiyyatda və memarlıqda öz əksini tapmışdır. Müasir Afrika incəsənəti hazırda inanılmaz bir yüksəliş və yenilənmə dövrünü yaşayır. Son onilliklərdə keçirilən biennalelər və beynəlxalq sərgilər Afrika rəssamlarını qlobal incəsənət diskursunun ön sırasına çıxarmışdır. “Ex Africa” sərgisi tamaşaçını Afrikanı sadəcə bir periferiya deyil, dünya sivilizasiyası və yaradıcılığının əsas “mühərriklərindən” biri kimi yenidən qiymətləndirməyə dəvət edir.

Bu qlobal tanınmanın arxasında yerli xalqların müasirliyi, qarışıq estetikası və kolonial çərçivələri aşan bədii müqaviməti haqqında daha mürəkkəb bir hekayə gizlənir. Müasir Afrika incəsənəti eyni anda həm ənənəvi irsdən, həm xristianlıq və islamdan, həm də müasir qlobal təsirlərdən ilham alaraq çoxsəsli vizual dil yaradır. Qrup sərgisi Azərbaycan tamaşaçılarını regionda hələ geniş məlum olmayan, lakin beynəlxalq səviyyədə tanınan yeni nəsil Afrika rəssamları ilə tanış edir. Sərgi dörd əsas tematik istiqamət üzrə qurulub: “Tarixin əks-sədası” (postkolonial irsə qayıdış), “Vücudlar və portretlər” (şəxsiyyətin bədii təzahürləri), “Şəhər dramı” (miqrasiya və transformasiya hekayələri), həmçinin Nigeriyanın səkkiz dilinə əsaslanan “Yoxa çıxan səslər” adlı səs instalyasiyası. Sərgi 26 noyabr 2025-ci il tarixindən 5 aprel 2026-cı il tarixinə kimi davam edəcək.