Yunanıstan–Bolqarıstan interkonnektoru vasitəsilə tədarük olunan qazın həcmi açıqlandı

1 oktyabr 2022-ci ildən etibarən kommersiya təchizatlarının başlamasından 2025-ci ilin oktyabr ayının sonuna qədər Yunanıstan–Bolqarıstan (IGB) interkonnektoru vasitəsilə nəql edilən qazın ümumi həcmi müəyyənləşib. Boru kəmərinin operatoru olan ICGB AD şirkətindən verilən məlumata görə, Yunanıstandan Bolqarıstana 39 854 049 MVt/s qaz göndərilib. Virtual olaraq əks istiqamətdə, yəni Yunanıstana isə 1 919 228 MVt/s həcmində nəql baş tutub. Bu kəmər Bolqarıstana müxtəlif mənbələrdən təbii qaz tədarükü üçün ilk marşrut kimi özünü sübut edib. Kəmər ölkənin daxili istehlakının 50%-dən çoxunu təmin edir. Boru kəməri regional səviyyədə, Cənubdan Şimala miqyaslı iki tərəfli qaz axınlarını dəstəkləməyi hədəfləyir.

IGB eyni zamanda region ölkələri üçün mayeləşdirilmiş təbii qaza (MTQ) və digər fərqli mənbələrə çıxışı genişləndirməyi hədəfləyən Şaquli Qaz Dəhlizi təşəbbüsünün mərkəzi hissəsidir. ICGB, nəql sisteminin müstəqil operatoru olaraq, "Route 2" və "Route 3"ün həyata keçirilməsi üçün tərəfdaşlarla aktiv əməkdaşlığı davam etdirir. Bu marşrutların işə salınması regional enerji təhlükəsizliyini daha da gücləndirəcək. Bu həm də Moldova və Ukrayna kimi bazarlara qaz tədarükü üçün yeni imkanlar yaradacaq. Yeni güclər regionda enerji təhlükəsizliyinin dəyişən dinamikasına uyğun gələn çevik bazar həllini təmsil edir.

ICGB-nin icraçı direktoru Teodora Georgieva bildirib ki, son aylardakı nəticələr IGB layihəsinin arxasında duran tərəfdaşlıq əlaqələrinin gücünü əks etdirir. O vurğulayıb ki, Azərbaycanla uzunmüddətli əməkdaşlıq və Azərbaycan qazının uzunmüddətli tədarük müqaviləsi ilə təmin olunan sabitlik Bolqarıstan və bütün region üçün fundamental əhəmiyyət kəsb etməyə davam edir. Eyni zamanda, Şaquli Qaz Dəhlizi və IGB marşrutu ABŞ MTQ-i daxil olmaqla, təchizatların şaxələndirilməsi üçün yeni yollar açır. Bu vəziyyət regional bazarların dayanıqlığını əlavə olaraq artırır.

IGB kəməri Yunanıstanın Komotini bölgəsində Yunanıstanın milli qaz nəqliyyat sistemi (DESFA S.A.) və Trans-Adriatik qaz kəməri (TAP AG) ilə birləşdirilmişdir. O, həmçinin Bolqarıstanın Stara-Zaqora bölgəsində Bolqarıstanın qaz nəqliyyat sistemi (Bulgartransgaz EAD) ilə əlaqə qurur. Qaz kəmərinin ümumi uzunluğu 182 km, borunun diametri 32 düymdür. Layihə gücü Yunanıstan–Bolqarıstan istiqamətində ildə 3 milyard kubmetr qazın nəqlini nəzərdə tutur. Bazar marağı və qonşu qaz nəqliyyat sistemlərinin imkanlarından asılı olaraq, bu həcm illik 5 milyard kub metrə qədər artırıla bilər.