Zəfər Günü Niderlandda qeyd edilib

Haaqada Azərbaycanın Zəfər Günü münasibətilə "Mənim Azərbaycanım: Odlar Yurdunun ritmləri" adlı xüsusi konsert proqramı təşkil olunub. Azərbaycanın Niderlanddakı Səfirliyinin təşkil etdiyi bu tədbirə maraq böyük idi. Mərasimə bu ölkənin dövlət qurumlarının, orada akkreditə olunmuş diplomatik korpusun nümayəndələri qatılmışdı.

İştirakçılar arasında həm siyasi, həm də ictimai dairələrin, işgüzar, mədəniyyət və akademik çevrələrin təmsilçiləri var idi. Kütləvi informasiya vasitələrinin nümayəndələri, eləcə də Niderlandda yaşayan Azərbaycan icmasının üzvləri də tədbirdə fəal iştirak ediblər.

Azərbaycanın Niderland Krallığındakı səfiri Məmməd Əhmədzadə tədbirdə çıxış edərək mühüm dövlətçilik məsələlərinə toxundu. Səfir 2025-ci ilin ölkədə Konstitusiya və Suverenlik İli elan edilməsini qeyd etdi. O, bu günlərdə Zəfərin beş illiyinin və Dövlət Bayrağı Gününün qeyd olunmasını dövlətçiliyimizin möhkəmlənməsinin və milli birliyin təntənəsi olduğunu bildirdi. M.Əhmədzadə bu tədbiri sülhün, dostluğun və Azərbaycan-Niderland mədəni əlaqələrinin parlaq rəmzi adlandırdı.

Rəsmi çıxışlardan sonra tədbirin bədii hissəsi başladı. Rəngarəng konsert proqramında Azərbaycanın "Ritm" rəqs qrupu gözəl performans göstərdi. Onlar "Qaytağı", "Sarı gəlin", "Vağzalı", "Çay", "İgidlər", "İnnabı", "Nağara", "Uzundərə", "Fantaziya" və "Yallı" kimi milli rəqsləri nümayiş etdirdilər. Həmçinin Niderlandda yaşayan azərbaycanlı ifaçılarla ölkədən gəlmiş musiqiçilər musiqi kompozisiyaları ilə çıxış etdilər.

Bu böyük mərasim Azərbaycan Niderlanddakı Səfirliyinin, Diasporla İş üzrə Dövlət Komitəsinin, Azərbaycan Diasporuna Dəstək Fondunun və Azərbaycan-Niderland "Odlar Yurdu" Cəmiyyətinin birgə təşkilatçılığı sayəsində baş tutdu. Bu birgə mədəniyyət təşəbbüsü Azərbaycanın zəfər ruhunu beynəlxalq səviyyədə yaymaq baxımından önəmlidir.