Zəfər xronikası. 26 oktyabr 2020-ci il: Birinci vitse-prezident Mehriban Əliyeva Zəngilan, Cəbrayıl, Qubadlı rayonlarının bir sıra kəndləri və Qubadlı şəhərinin işğaldan azad edilməsi münasibətilə xalqımızı təbrik edib (FOTO)

2020-ci il sentyabrın 27-də Ermənistan silahlı qüvvələrinin cəbhəboyu genişmiqyaslı təxribat törətməsinə cavab olaraq Azərbaycan Ordusu əks-hücum əməliyyatına başladı. Bu hərbi əməliyyat sonradan "Dəmir yumruq" adlandırıldı. 44 gün davam edən Vətən müharibəsi təxminən otuzillik işğala son qoyulması və ölkəmizin ərazi bütövlüyünün bərpası ilə nəticələndi. Zəfər xronikasında 26 oktyabr 2020-ci il tarixi xüsusi əhəmiyyət daşıyır. Həmin gün Azərbaycan Silahlı Qüvvələri Zəngilan, Cəbrayıl, Qubadlı rayonlarının bir sıra kəndlərini və Qubadlı şəhərini işğaldan azad etdi.

Bu böyük hərbi uğurdan sonra Azərbaycanın Birinci vitse-prezidenti Mehriban Əliyeva xalqımızı təbrik etdi. O, rəsmi hesabında bu qələbə münasibətilə paylaşım edib. Paylaşımda Birinci vitse-prezident azad edilən əraziləri sadalayaraq təbrik mesajını çatdırdı. O, xüsusilə Azərbaycan əsgərinin göstərdiyi qəhrəmanlığı vurğuladı.

Mehriban Əliyeva öz mesajında hərbiçilərə dərin minnətdarlığını bildirərək qeyd etdi: "Zəngilan, Cəbrayıl, Qubadlı rayonlarının bir sıra kəndləri və Qubadlı şəhəri işğaldan azad edildi! Bu münasibətlə bütün xalqımıza səmimi təbriklərimi çatdırıram! Hər bir yeni qələbənin əldə edilməsi əsgərlərimizin qəhrəmanlığı, şücaəti, cəsarəti, igidliyi və mətanəti sayəsində mümkün olur. Onların hər birinə hədsiz dərəcədə minnətdaram! Uca Tanrı ordumuzu, xalqımızı, Vətənimizi və Prezidentimizi qorusun! Qarabağ Azərbaycandır!" Bu təbrik xəbərləri 2020-ci ilin payızında xalqımızın qələbə əzmini gücləndirən mühüm anlardan biri oldu.