“Zəfərə açılan pəncərə” bədii-sənədli filminin təqdimatı keçirilib (YENİLƏNİB)

Nizami Kino Mərkəzində “Zəfərə açılan pəncərə” adlı bədii-sənədli filminin təqdimatı keçirilib. Ümumi xronometrajı 44 dəqiqə olan bu ekran əsəri Azərbaycanın zəfərinin 5 illiyinə həsr olunub. Filmin əsas mövzusu Dilqəm Əsgərov haqqındadır; o, erməni seperatçıları tərəfindən ömürlük həbs cəzasına məhkum edilmişdi.

Filmin müəllifi, Əməkdar jurnalist və Audiovizual Şuranın üzvü Mübariz Əsgərovdur. Ekran əsərində Dilqəm Əsgərov yaşadığı həbsxananı addım-addım gəzir və istirablı anlarını danışır. Kamera onun Kəlbəcərə gizli keçdiyi yolları, gecələr qaldığı yerləri, tutulduğu meşəni və ata ocağını lentə alıb. Əsər sadəcə Dilqəmin hekayəsini deyil, eyni zamanda ümumilikdə Qarabağ müharibəsinin əsir və girovları məsələsini işıqlandırır.

Bu mühüm layihə Mədəniyyət Nazirliyi, Kino Agentliyi, Audiovizual Şura, Əsir və itkin düşmüş, girov götürülmüş vətəndaşlarla əlaqədar Dövlət Komissiyası kimi dövlət qurumlarının birgə təşkilatçılığı və dəstəyi ilə ərsəyə gəlib. “Qulp” Studiyası və “Referans Medical Group” da filmin çəkilişinə dəstək göstərən təşkilatlar sırasındadır. Təqdim edilən sənədli film zəfər yolunda çəkilən çətinliklərin vacib bir qeydidir.