Zəfərin 5-ci ildönümü Tbilisidə qeyd olunub (FOTO)

Gürcüstanın paytaxtı Tbilisidə Zəfər Gününün 5-ci ildönümü münasibətilə təntənəli tədbir keçirilib. Şota Rustaveli adına Dövlət Teatrında baş tutan bu böyük tədbir Azərbaycanın Gürcüstandakı səfirliyinin təşkilatçılığı və Diasporla İş üzrə Dövlət Komitəsinin dəstəyi ilə həyata keçirildi.

Mərasimdə yüksək səviyyəli qonaqlar iştirak edirdilər. Onların arasında Azərbaycan və Gürcüstan parlamentlərinin deputatları, diplomatik korpusların təmsilçiləri, rəsmi şəxslər və ictimaiyyət nümayəndələri vardı. Tədbirə start verilməzdən əvvəl “Zəfərə aparan yol” sənədli filmi göstərildi, daha sonra isə şəhidlərin əziz xatirəsi bir dəqiqəlik sükutla yad edildi.

Azərbaycanın Gürcüstandakı səfiri Faiq Quliyev Vətən müharibəsi və qazanılmış böyük qələbə haqqında geniş məlumat verdi. Səfir bu mərasimin iki ölkə xalqları arasında mövcud olan dostluq və həmrəyliyin parlaq bir nümunəsi olduğunu vurğuladı. Diasporla İş üzrə Dövlət Komitəsinin sədr müavini Vaqif Seyidbəyov da çıxış etdi. O, müharibə dövründə xalqımızın və dünya azərbaycanlılarının nümayiş etdirdiyi birliyi diqqətə çatdırdı. Sədr müavini şanlı Zəfərin xalqımızın əzmini və tarixi ədalətin təntənəsini təcəssüm etdirdiyini söylədi. O, Komitənin dəstəyi ilə dünyanın müxtəlif ölkələrində keçirilən digər tədbirlər barədə də danışdı.

Çıxışlarda Azərbaycanın müstəqilliyi və suverenliyi uğrunda canlarını qurban verən qəhrəmanların adlarının xalqın yaddaşına əbədi yazıldığı bildirildi. Həmçinin vurğulandı ki, bu böyük qələbə Azərbaycan xalqının Müzəffər Ali Baş Komandan İlham Əliyevə olan inamının və millətin sarsılmaz birliyinin nəticəsidir. Rəsmi hissədən sonra tədbirin bədii hissəsinə keçildi. Müğənni Zamiq Hüseynov vətənpərvərlik ruhunda ifaları ilə mərasimə xüsusi rəng qatdı. Gürcüstanın Dövlət Rəqs Akademiyasının “Erisioni” ansamblı da səhnədə maraqlı rəqs nümunələri ilə çıxış edərək gecəni başa çatdırdı.