Zəngilanın Məmmədbəyli kəndində bütün fərdi yaşayış evlərində günəş panelləri quraşdırılıb

Zəngilanın Məmmədbəyli kəndindəki bütün fərdi yaşayış evləri günəş panelləri ilə təmin edilib. Bu mühüm yenilik barədə Bərpa, Tikinti və İdarəetmə Xidmətinin (BTİX) İctimaiyyətlə əlaqələr şöbəsinin müdiri İlhamiyyə Rzayeva məlumat verib. Məlumatı o, Cəbrayıl, Qubadlı və Zəngilan rayonlarına təşkil edilən mediatur zamanı bildirib. Məmmədbəyli kəndi ümumilikdə 51.6 hektar ərazini əhatə edir. Kənddəki evlər tam müasir kommunikasiya şəbəkəsi ilə təchiz olunub. Bu şəbəkə su, işıq, qaz, yüksək sürətli internet və yeni yollar kimi zəruri infrastruktur elementlərini özündə birləşdirir.

Kənd ərazisində 188 fərdi yaşayış evi inşa edilib. Bundan əlavə, iki ədəd çoxfunksiyalı qeyri-yaşayış binası da tikilib. Fərdi yaşayış evləri fərqli otaq saylarına malikdir: 39 ev iki, 55 ev üç, 55 ev dörd, digər 39 ev isə beş otaqlıdır. Bütün evlər xüsusi dizaynda hazırlanıb. Hər bir fərdi yaşayış evinin yanında 0.12 ha həyətyanı ərazi nəzərdə tutulub və bu ərazilər hasarlanıb.

Kəndin vizual cəlbediciliyini artırmaq məqsədilə inzibati binalarda, eləcə də keçid və istinad divarlarında rəsmlər və dekorativ rəngləmələr işlənib. Bu işlər Məmmədbəyli kəndinin ümumi estetik görünüşünə müasirlik və xüsusi üslub qatıb. Kənd Ağalı kəndinə çox yaxın yerləşdiyi üçün iqtisadi səmərəliliyin təmin olunması üçün xüsusi addım atılıb. Ağalı və Məmmədbəyli kəndlərini birləşdirən keçid inşa edilib. Bu keçid sayəsində Məmmədbəyli sakinləri Ağalı kəndindəki böyük infrastrukturdan rahatlıqla istifadə edə biləcəklər. Bu obyektlərə 360 şagird yerlik tam orta məktəb, 60 yerlik uşaq bağçası, Ailə sağlamlıq mərkəzi və digər əsas xidmət mərkəzləri daxildir.