ABŞ-də Azərbaycan pasportu daşıyan erməni tutuldu

ABŞ-ın İmmiqrasiya və Gömrük Polisi (ICE) Los-Anceles şəhərində diqqətçəkən bir həbs həyata keçirib. Polis Azərbaycan pasportu daşıyan şəxsi saxladığını açıqlayıb. Saxlanılan şəxsin Rafael Vladimiroviç Sarkisyan olduğu bildirilir. Onun əvvəlki fəaliyyəti müxtəlif cinayətlərlə əlaqəli olub. Sarkisyan fərqli vaxtlarda heyvanlara qarşı qəddarlıq və qadağan olunmuş maddələrin saxlanması kimi ittihamlarla məhkum edilib.

ICE nümayəndələri Sarkisyanın 25 noyabr tarixində Los-Ancelesdə tutulduğunu təsdiqləyib. O, hazırda deportasiya prosesi tam başa çatana qədər saxlanma mərkəzində qalacaq. Maraqlı məqam isə onun ABŞ ərazisinə hansı ölkədən və nə vaxt daxil olduğu barədə hələ də dəqiq məlumatın olmamasıdır. Bu detallar miqrasiya proseduru baxımından mühüm sayılır.

Əldə edilən məlumatlar Rafael Sarkisyanın etnik mənsubiyyətinin erməni olduğunu göstərir. O, böyük ehtimalla 1990-cı illərin əvvəllərində sovet pasportu ilə Azərbaycandan köçmüş şəxslərdən biridir. Bu səbəbdən o, müstəqil Azərbaycan Respublikasının vətəndaşı sayılmır. Ancaq ABŞ rəsmiləri deportasiya qərarını verərkən, şəxsin üzərində tapılan sənədləri əsas götürür. Buna görə də, Sarkisyanın yüksək ehtimalla Azərbaycana göndərilməsi gözlənilir.