Alonso Ardadan bunu tələb etdi

Xabi Alonso Çempionlar Liqasında "Yuventus"a 1:0 hesabı ilə qalib gəldikləri oyundan sonra Arda Gülerin çıxışını tərifləyib, lakin ondan daha çox irəliləyiş gözlədiyini bildirib. Alonso Ardanın meydanda olması ilə komandanın dinamikasının əhəmiyyətli dərəcədə yaxşılaşdığını qeyd edib. O, həmçinin gənc futbolçunun təcrübəsini artırması üçün ona dəstək verilməsinin vacibliyini dilə gətirib. Məşqçinin sözlərinə görə, Arda oyuna böyük maraq gətirir və topu qəbul etdiyi an komandanın hərəkətliliyi artır.

Alonso Ardanın bəzi oyun bacarıqlarını təkmilləşdirməsinə ehtiyac olduğunu vurğulayıb. Məşqçi futbolçunun qərar vermə qabiliyyətini və meydandakı pressinq texnikasını inkişaf etdirməli olduğunu hesab edir. Alonso: "O, topu alanda komandanın dinamikası yaxşılaşır. Onun irəliləyişindən çox məmnunam, amma biz daha çoxunu istəyirik”, - deyə bildirib. Bu açıqlamalar göstərir ki, Alonso Ardanın hazırkı səviyyəsini yüksək qiymətləndirsə də, ondan maksimum nəticə almağı hədəfləyir.

Qeyd edək ki, Arda Güler bu mövsüm artıq ciddi statistik göstəricilər əldə edib. Gənc futbolçu bütün yarışlarda iştirak etdiyi 18 oyunda 4 dəfə rəqib qapılarına yol tapıb. Bundan əlavə, o, komanda yoldaşlarına 7 məhsuldar ötürmə edərək hücumların qurulmasında aktiv rol oynayıb. Alonso gələcəkdə bu rəqəmlərin Ardanın tələb olunan bacarıqları inkişaf etdirməsi ilə daha da artacağına inanır.