Avropada həyəcan çağırışı - 10 günlük qida ehtiyatı saxlayın

Almaniya hökuməti bütün evlər üçün ehtiyat tədbiri olaraq 3-10 gün davam edəcək qədər gündəlik təcili yardım və ərzaq məhsulları saxlanılmasını tələb edir. Bu barədə Mülki Müdafiə və Fəlakətlərə Yardım üzrə Federal Ofisin dərc etdiyi "Böhran və Fəlakətlərə Hazırlıq" adlı hesabatında bildirilir. Sənəddə deyilir ki, Almaniya dünyanın ən təhlükəsiz ölkələrindən sayılsa da, gündəlik həyatı poza bilən böhranlar və ya fəlakətlər baş verə bilər. Bu tədbir ölkə vətəndaşlarını gözlənilməz vəziyyətlərə hazır olmağa sövq edir.

Hesabatda qeyd edilir ki, müasir dövrdə təhlükələr təkcə təbii fəlakətlərlə məhdudlaşmır. Ekstremal hava hadisələri, kiberhücumlar, dezinformasiya və təxribatlar infrastruktur üçün ciddi təhlükələr yarada bilər. Bu hallar həmçinin ictimai rəyə və sosial birliyə də zərər verə bilər. Ən diqqət çəkən məqam isə müharibə ehtimalıdır. Məlumatda deyilir ki, müharibə ehtimalı bir neçə il əvvəl göründüyü qədər də qeyri-mümkün deyil. Bu səbəbdən fərdi hazırlıq getdikcə daha vacib hala gəlir və vətəndaşlar baş verə biləcək hər hansı təhlükəyə hazır olmalıdırlar.

Hazırlanan broşürdə insanlar üçün vacib olan ləvazimatlar sadalanır. Sənəd vətəndaşlara böhran və fəlakət zamanı kömək gələnə qədər özlərinə necə qulluq etməli olduqlarını izah edir. Evdə mütləq saxlanılması lazım olan əşyalar arasında su, qida, tibbi xidmət və gigiyena ləvazimatları var. Bu təlimatın əsas məqsədi vətəndaşların ilk bir neçə gün ərzində dövlət qurumlarına yüklənmədən öz ehtiyaclarını qarşılamalarını təmin etməkdir.