Azərbaycanlı həkim Xəzərdə itkin düşdü - FOTO

Azərbaycanlı həkim Tural Sultanov bir aydır ki, itkin düşüb. Onun yaxın qohumu, jurnalist Pərvanə Sultanova bu barədə məlumat verib. Tural 33 yaşında idi və “BUE CASPİAN LTD” şirkətinə məxsus gəmidə işləyirdi. Ailəsi Turalın itkin düşməsi xəbərini gəmi Xəzər dənizində olarkən alıb.

Əmisiqızı qeyd edib ki, Tural çox savadlı idi; o, Kazan Tibb Universitetini bitirmiş və Almaniyada təhsil almışdı. Həkim eyni zamanda dörd xarici dildə danışırdı. Turalın atası da həkimdir. Gəmidə işləmək Turalın öz seçimi olsa da, indi ailəsi bir aydır ondan xəbər ala bilmir.

Atası oğlunun itkin düşməsi ilə bağlı xəbəri bir ay əvvəl aldı. Bu müddətdə geniş axtarışlar aparılsa da, Turalın nə dirisi, nə də ölüsü tapıla bilmədi. Axtarışlar sentyabrın 27-dən, yəni hadisə baş verdiyi gündən davam edirdi. Xilasetmə əməliyyatlarına beş gəmi və helikopter cəlb edilmişdi. Təəssüf ki, indi axtarışları dayandırıblar. Ailəyə axtarış müddətinin başa çatdığı bildirilib. Ailənin ən böyük istəyi Turalın tapılmasıdır; hamının gözü yoldadır.

Turalın itkin düşməsi ilə əlaqədar fərqli versiyalar irəli sürülür. Məsələn, bəziləri dənizdə çox dərinə üzdüyünü deyirlər. Lakin ailəsi Turalın üzgüçülüyü çox yaxşı bacardığını, hətta fırtınalı havada da üzə bildiyini deyir. Bildirilir ki, itkin düşdüyü gün hava şəraiti həqiqətən də pis olub. Bütün səylərə baxmayaraq, axtarışların dayandırılması ailəni çox çətin vəziyyətdə qoyub.