Azərbaycanlı jurnalist Rusiyada "xarici agent" elan edildi

Azərbaycanlı jurnalist və şərqşünas Ruslan Süleymanovun adı Rusiyada "xarici agentlər"in reyestrinə əlavə edilib. Bu barədə məlumat Rusiya Ədliyyə Nazirliyinin saytında yerləşdirilib.

Onunla yanaşı, rusiyalı jurnalistlər İrina Novik və Nino Rosebaşvili, həmçinin Dmitri Çernışevski də "xarici agent" elan olunublar. Nazirlik qeyd edib ki, bu şəxslər Rusiyada fəaliyyəti arzuolunmaz hesab edilən xarici və beynəlxalq təşkilatlar tərəfindən materialların yaradılmasında və yayılmasında iştirak ediblər. Bu təyinat həmin şəxslərin fəaliyyətinə ciddi təsir göstərəcək.

Ruslan Süleymanov 30 yaşındadır; atası azərbaycanlı, anası isə ukraynalıdır. O, Ukrayna münaqişəsi başladıqdan sonra əvvəl işlədiyi TASS agentliyindən ayrılıb. Jurnalist hazırda Bakıda yaşayır.