Bakı metrosunda 15 yeni vaqon istismara buraxıldı

Bakı metropoliteninin xətlərinə daha 15 yeni vaqon əlavə edilib. Depolar üzrə İş Departamentinin baş mühəndisi Aydın Bəkirov bu barədə açıqlama verib. AZCON Holding şirkətlərindən olan Bakı Metropoliteni xidmət keyfiyyətini və sərnişin məmnuniyyətini yüksəltmək məqsədi ilə müasir qatar parkını genişləndirməyə davam edir.

Ən son texnologiyalarla hazırlanmış dördüncü nəslə aid olan bu 3 qatar (ümumilikdə 15 vaqon) metropoliten xətlərində istismara buraxılıb. Bu vaqonlar istismar müddəti başa çatan əvvəlki nəsil vaqonları əvəz edir. Bu addım metro sərnişinləri üçün daha rahat və təhlükəsiz səyahət şəraiti yaradır. Yeni vaqonlar Bakı Metropoliteninin texniki tələbləri nəzərə alınmaqla hazırlanıb və sərnişinlər üçün bir sıra mühüm üstünlüklər təqdim edir.

Onlar müasir mikroiqlim sistemi (kondisioner) ilə təchiz olunub. Vaqonlararası birbaşa keçidin tətbiqi sayəsində sərnişin tutumu 15 faiz artıb. Qapıların daha enli olması və açılıb-bağlanma zamanı işıqlı xəbərdarlıq indikatorları sərnişinlərin hərəkətini asanlaşdırır. Rahatlığı artırmaq üçün vaqonlarda ayaqüstə dayanan sərnişinlər üçün çoxfunksiyalı zonalar mövcuddur. Burada iri yüklər və uşaq arabaları üçün xüsusi sahələr ayrılıb. Metrodan istifadənin əlçatan olması nəzərə alınaraq, baş vaqonlar əlil arabalarının yerləşdirilməsi üçün xüsusi yerlərlə təmin edilib.

Texniki yeniliklər təkcə rahatlıqla məhdudlaşmır. Vaqonlarda təzyiqin tənzimlənməsi və ultrabənövşəyi lampalarla havanın bioloji təmizlənməsi sistemləri quraşdırılıb. Sərnişinlər elektron qurğularını doldurmaq üçün USB yuvalarından da istifadə edə bilərlər. Təhlükəsizliyə gəldikdə, daxili və xarici videomüşahidə sistemləri mövcuddur ki, bu da maşinistə qatarı tam nəzarətdə saxlamağa imkan verir. İşıqdiodlu cihazların (LED) tətbiqi sayəsində elektrik enerjisi sərfiyyatı 50 faiz azalıb, istismar müddəti isə 75 faiz artıb.

Bakı Metropolitenində müasirləşmə işləri davam edir. Hazırda sazlama və komplektləşdirmə işləri aparılan daha 15 vaqon 2025-ci ilin sonunadək xətlərə buraxılacaq. Bu artımla Bakı Metropolitenində yeni nəsil vaqonların sayı 180-ə çatdırılacaq (36 qatar tərkibi). Dövlət Proqramına uyğun olaraq, 2030-cu ilədək ümumilikdə 299 yeni nəsil vaqonun alınması planlaşdırılır.