Bakının bu ərazisindəki sakinlərə 3 gün vaxt verildi

Bakının Yasamal rayonunda yaşayan bəzi sakinlər kondisionerlərin sökülməsi barədə xəbərdarlıq alıblar. Mənzil-Kommunal Təsərrüfat Birliyi (MKTB) tərəfindən göndərilən bildirişə görə, binaların fasadlarında quraşdırılan kondisionerlər və digər əşyalar üç gün ərzində çıxarılmalıdır. Əks halda, qurum özü həmin avadanlıqları söküb aparacaq. Bu tələb şəhərdə aparılan abadlıq işləri ilə əlaqədar irəli sürülüb.

Sakinlərin sözlərinə görə, MKTB tərəfindən edilən bildirişdə qeyd olunub ki, binaların fasadlarında quraşdırılan avadanlıqlar sökülməlidir. Bu xəbərdarlıq İ.Səfərli küçəsi ilə D.Əliyeva, Vidadi, B.Səfəroğlu, A.Quliyev, H.Aslanov, L.Tolstoy, S.Tağızadə və Nizami küçələrinin kəsişmələrində yerləşən iaşə obyektlərini, mənzilləri, müəssisə və özəl təşkilatları əhatə edir. Qurum xüsusilə iaşə obyektlərinin, mənzillərin, müəssisə və özəl təşkilatların qarşısında və ətrafında quraşdırılmış dəmir maneələri, yağış çardaqlarını, kondisionerləri və digər avadanlıqları 3 (üç) gün müddətinə sökülməsini tələb edir.

Bəzi sakinlər bu tələblə bağlı öz etirazlarını bildirirlər. Onlar qeyd edirlər ki, binaların arxa tərəfinə pəncərələr açılmadığına görə, kondisionerləri yerləşdirmək üçün başqa imkanları yoxdur. Bu səbəbdən avadanlıqların sökülməsini istəmirlər. Sakinlər məsul qurumlara müraciət edərək, yaranmış problemin alternativ həll yollarını nəzərdən keçirməyi xahiş ediblər.