BƏƏ ilə Azərbaycan arasında hərbi əməkdaşlıq məsələsi müzakirə olundu

Birləşmiş Ərəb Əmirliklərinin (BƏƏ) dövlət nümayəndələri heyəti Azərbaycana səfər edib. Müdafiə Nazirliyi bu səfərlə bağlı rəsmi məlumat yayıb. İşçi görüş Müdafiə Nazirliyinin Beynəlxalq Hərbi Əməkdaşlıq İdarəsində baş tutub.

Görüş zamanı qeyd olundu ki, ölkələr arasında əlaqələr bütün sahələrdə, o cümlədən hərbi sahədə də inkişaf edir. Təcrübə mübadiləsi baxımından qarşılıqlı səfərlərin, eyni zamanda birgə təlimlərin böyük əhəmiyyəti diqqətə çatdırıldı. Bu cür əlaqələr iki ölkənin müdafiə qabiliyyətini artırmağa xidmət edir.

Qonaqlara 44 günlük Vətən müharibəsi barədə ətraflı brifinq təqdim olundu. Onlara regiondakı mövcud vəziyyət və digər əlaqəli mövzular haqqında məlumat verildi. Nümayəndə heyətini maraqlandıran suallar cavablandırıldı. Sonda tərəflər hərbi əməkdaşlığın mövcud vəziyyəti və gələcək inkişaf perspektivlərinə dair geniş fikir mübadiləsi aparıblar. Görüşün sonunda qarşılıqlı hədiyyələr təqdim olundu və xatirə şəkli çəkdirildi.